މިހާރު ކުރިއަށްދާ ބައި-އިލެކްޝަންތަކުގައި މިއަދު ހެނދުނު 10:00 އާ ހަމައަށް ވޯޓުލާފައިވަނީ ވޯޓުލުމުގެ ހައްގު ލިބިފައިވާ މީހުންގެ ތެރެއިން 2،633 މީހުން -- 4.70 ޕަސަންޓް ކަމަށް އިލެކްޝަންސް ކޮމިޝަނުން ހާމަކޮށްފި އެވެ.
މާލޭގެ މޭޔަރާއި މާލެ ސިޓީ ކައުންސިލްގެ މާފަންނު ދެކުނު ދާއިރާ، މެދުހެންވޭރު ދާއިރާ، ހެންވޭރު ދެކުނު ދާއިރާގެ މެންބަރު އަދި މ. މުލަކު އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ބައި-އިލެކްޝަންގެ ވޯޓުލުން ފަށާފައިވަނީ މިއަދު ހެނދުނު 8:00 ގަ އެވެ.
މި އިންތިހާބުތަކުގައި ޖުމްލަ 56،002 މީހުންނަށް ވޯޓުލުމުގެ ހައްގު ލިބޭއިރު މޭޔަރު ހޮވުމަށް ބާއްވާ ބައި-އިލެކްޝަންގައި 54،680 މީހުންނަށް ވޯލުމުގެ ހައްގު ލިބެ އެވެ.
އިލެކްޝަންސް ކޮމިޝަނުން ބުނި ގޮތުގައި މި އިންތިހާބުތަކުގައި ފުރަތަމަ ދެ ގަޑިއިރުގެ ތެރޭގައި ވޯޓުލާފައިވަނީ 1،007 އަންހެނުންނާއި 1،626 ފިރިހެނުންނެވެ.
މި ބައި-އިލެކްޝަންތަކުގައި މިއަދު ހެނދުނު 9:00 އާ ހަމައަށް ވޯޓުލާފައިވަނީ ޖުމްލަ 1،204 މީހުންނެވެ.
ބައި-އިލެކްޝަންތަކުގައި ވޯޓުލާ ވަގުތުގެ ގޮތުގައި ކުރިން ކަނޑައަޅާފައި އޮތީ ހެނދުނު 8:00 އިން ހަވީރު 4:00 އަށެވެ. ނަމަވެސް ރާއްޖޭގެ ބޮޑު ސަރަހައްދަކަށް މޫސުން ގޯސްވެފައިވާތީ އިލެކްޝަންސް ކޮމިޝަނުން މިހާރު ވަނީ މިއަދު ބާއްވާ ބައި-އިލެކްޝަންތަކުގެ ވޯޓުލާ ވަގުތު އިތުރު އެއްގަޑިއިރަށް އިތުރުކޮށްފަ އެވެ.