ތަރައްގީގެ މަޝްރޫއުތައް -- ޕަބްލިކް ސެކްޓާ އިންވެސްޓްމަންޓް ޕްރޮގްރާމް (ޕީއެސްއައިޕީ) މަޝްރޫއުތަކަށް މިދިޔަ އަހަރު 12 ބިލިއަނަށްވުރެ ގިނަ ރުފިޔާ ހޭދަކޮށްފި އެވެ.
ފިނޭންސް މިނިސްޓްރީގެ ވީކްލީ ފިސްކަލް ޑިވެލޮޕްމަންޓްސް ރިޕޯޓު ދައްކާ ގޮތުން ޑިސެމްބަރު 28 ވަނަ ދުވަހުގެ ނިޔަލަށް ޕީއެސްއައިޕީއަށް 12.1 ބިލިއަން ރުފިޔާ ހޭދަކޮށްފައިވެ އެވެ.
މިއީ މިދިޔަ އަހަރުގެ ސަޕްލިމެންޓްރީ ބަޖެޓާއެކު ޕީއެސްއައިޕީއަށް ކަނޑައެޅި 10.3 ބިލިއަން ރުފިޔާއަށްވުރެ 1.8 ބިލިއަން ރުފިޔާ އިތުރު މިންވަރެކެވެ.
ޕީއެސްއައިޕީ ބަޖެޓުން އެންމެ ބޮޑު ހޭދައެއްކޮށްފައިވަނީ ބިން ހިއްކުމުގެ މަޝްރޫއުތަކަށެވެ.
ބިން ހިއްކުމުގެ މަޝްރޫއުތަކަށް 2.1 ބިލިއަން ރުފިޔާ ހޭދަކޮށްފައިވާއިރު އެއާޕޯޓްގެ މަޝްރޫއުތަކަށް 1.6 ބިލިއަން ރުފިޔާ ހަރަދުކޮށްފައިވެ އެވެ.
ފެނާޢި ނަރުދަމާގެ މަޝްރޫއުތަކަށް 1.5 ބިލިއަން ރުފިޔާ ހޭދަކުރިއިރު މަގު ހެދުމުގެ މަޝްރޫއުތަކަށް 1.4 ބިލިއަން ރުފިޔާ އަދި ހާބަރު މަޝްރޫއުތަކަށް 1.1 ބިލިއަން ރުފިޔާ ހަރަދުކުރި އެވެ.
ބްރިޖު މަޝްރޫއަށް 757.3 މިލިއަން ރުފިޔާ ހޭދަކުރިއިރު ބޯހިޔާވަހިކަމުގެ މަޝްރޫއުތަކުގެ ހަރަދު 922 މިލިއަން ރުފިޔާއަށް އަރަ އެވެ.
ޕީއެސްއައިޕީ މަޝްރޫއުތަކަށް މިދިޔަ އަހަރުގެ ބަޖެޓުގައި ފުރަތަމަ ކަނޑައެޅީ 8.5 ބިލިއަން ރުފިޔާ އެވެ. ނަމަވެސް ބަޖެޓަށްވުރެ ހަރަދުތައް އިތުރުވެ ފިނޭންސް މިނިސްޓްރީން ރައްޔިތުންގެ މަޖިލީހަށް ހުށަހަޅައި ފާސްކުރި ސަޕްލިމެންޓްރީ ބަޖެޓުގައި ޕީއެސްއައިޕީ މަޝްރޫއުތަކަށް އިތުރު 1.7 ބިލިއަން ރުފިޔާ ކަނޑައެޅި އެވެ.