އަފްގާނުގައި އިއްޔެ ދިން ބޮމުގެ ހަމަލާތަކުގައި 25 މީހުން މަރުވެ އެތައް ބަޔަކު ޒަހަމްވެފައިވާތީ ރާއްޖޭގެ ރައީސުލްޖުމްހޫރިއްޔާ އަބުދުﷲ ޔާމިން އަބުދުލް ގައްޔޫމް، އަފްގާނިސްތާނުގެ ރައީސް މުހައްމަދު އަޝްރަފް ގަނީ އަށް ހަމްދަރުދީގެ މެސެޖެއް ފޮނުއްވައިފި އެވެ.
އިއްޔެ ބޮމުގެ ހަމަލާތަކެއއް ދީފައިވަނީ އަފްގާނުގެ ވެރިރަށް ކާބުލް އަދި ކުނާރު ޕްރޮވިންސްގެ އައްސަދު އާބާދަށެވެ.
ރައީސްގެ މެސެޖުގައި އަފްގާނުގެ އެތައް ބަޔަކު މަރުވެ، އެތައް ބަޔަކަށް އަނިޔާވި ހަބަރު އެއްސެވީ ކުއްލި ހައިރާންކަމަކާއި، ފުން ހިތާމައާއެކު ކަމަށް ވިދާޅުވެފައިވެ އެވެ.
އަދި، އަފްގާނިސްތާނުގައި މިހިނގި ޓެރަރިޒަމްގެ ފިނޑި އަމަލު، ދިވެހި ސަރުކާރާއި، ރައްޔިތުންނާއި، އެމަނިކުފާނުގެ އަމިއްލަ ނަންފުޅުގައި އެންމެ ހަރުކަށި އިބާރާތުން ރައީސް ވަނީ ކުށްވެރިކުރައްވާފަ އެވެ.
މީގެ އިތުރުން ދުނިޔެއަށް ކުރިމަތިވެފައިވާ ޓެރަރިޒަމްގެ ނުރައްކަލާ ދެކޮޅަށް ކުރަމުންދާ މަސައްކަތުގައި ރާއްޖެއިން އަބަދުވެސް ސާބިތުކަންމަތީ ދެމިތިބޭނެ ކަމަށާއި، މިކަމުގައި އަފްގާނިސްތާނާއި، ބައިނަލްއަގްވާމީ ދުނިޔެއާއެކު ރާއްޖެއިން ކެނޑިނޭޅި މަސައްކަތް ކުރަމުން ގެންދާނެ ކަމަށް ވެސް ރައީސްގެ މެސެޖުގައި ވިދާޅުވެފައިވެ އެވެ.
ރައީސްގެ މެސެޖުގައި، ގައުމީ ހިތާމައިގެ މިދަނޑިވަޅުގައި، ދިވެހި ސަރުކާރާއި، ރައްޔިތުންނާއި ރައީސުލްޖުމްހޫރިއްޔާގެ އަމިއްލަ ނަންފުޅުގައި، އަފްގާނިސްތާނުގެ ސަރުކާރަށާއި ރައްޔިތުންނަށް ވަރަށް އިހްލާސްތެރިކަމާއެކު ހަމްދަރުދީ ފޮނުއްވާފައިވެ އެވެ. އަދި މި ހާދިސާގައި މަރުވި މީހުންގެ އާއިލާތަކަށް ތައުޒިޔާ ރައްދުކޮށްދެއްވުމަށް ވެސް ރައީސުލްޖުމްހޫރިއްޔާގެ މެސެޖުގައި އެދިވަޑައިގެންފައިވެ އެވެ.
ރައީސް އަބުދުﷲ ޔާމިން އަދި އަފްގާނިސްތާނުގެ ރައީސް މުހައްމަދު އަޝްރަފް ގަނީ.--
