ޕްރޮސެކިއުޓާ ޖެނެރަލް ހުސެއިން ޝަމީމަށް ހަމަލާދިނުމުގެ ތުހުމަތުގައި ދެ މީހަކު ހައްޔަރުކޮށްފި އެވެ.
ޝަމީމަށް އިއްޔެ ހެނދުނު މޫނު ނިވާކޮށްގެން ތިބި ދެ މީހުން ހަމަލާ ދިނީ ޝަމީމް ދަރިފުޅު ސްކޫލަށްލުމަށްފަހު ގެއަށް ވަދެވަޑައިގަންނަވަން ދަނިކޮށެވެ.
މި ދެ މީހުން ޝަމީމަށް ހަމަލާ ދިނީ ސައިކަލެއްގައި އޭނާއާ ދުރާލައި ފާރަލަމުން އައިސްފައި ކަމަށްވެ އެވެ. މަރުތޭލެއް ކަހަލަ އެއްޗަކުން ޝަމީމަށް ހަމަލާދިނުމުން އޭނާގެ އުޅަނބޮށީގެ ކަށިގަނޑެއްގައި ވަނީ ރެނދުލާފަ އެވެ.
ނޫސްވެރިންނަށް މިއަދު މައުލޫމާތު ދެއްވަމުން ކޮމިޝަނާ އޮފް ޕޮލިސް އަލީ ޝުޖާއު ވިދާޅުވީ ޕީޖީ ޝަމީމަށް ދިން ހަމަލާގައި ހިމެނޭ ދެ މީހުން މިއަދު ހައްޔަރުކޮށްފައިވާ ކަމަށެވެ. ނަމަވެސް މިއީ ތަހުގީގު ފުރަތަމަ މަރުހަލާ ކަމަށްވާތީ ހައްޔަރުކުރި މީހުންގެ މައުލޫމާތު ސީޕީ ހާމައެއް ނުކުރައްވަ އެވެ.
ސީޕީ ވިދާޅުވީ ޕީޖީ ޝަމީމަށް ދިން ހަމަލާގެ ތަހުގީގު ފުލުހުން ކުރިއަށް ގެންދަނީ ސީރިއަސް މައްސަލައެއްގެ ގޮތުގައި ކަމަށެވެ. ސީޕީ ވިދާޅުވި ގޮތުގައި މިއީ ވަރަށް ބޮޑަށް ރޭވިގެން ކޮށްފައިވާ ކަމެކެވެ.
ހަމަލާ ދީފައިވާ ގޮތަށް ބަލާއިރު މިކަމުގެ ތެރޭގައި އިތުރު ބަޔަކު ބައިވެރިވުމަކީ އެކަށީގެންވާ ކަމެއް ކަމަށްވެސް ފުލުހުން ބުނެފައިވެ އެވެ.
ހަމަލާއަށްފަހު ޝަމީމް ސޯޝަލްމީޑިއާގައި ކުރެއްވި ޕޯސްޓެއްގައި ވިދާޅުވީ އެނބުރި އަންނާނީ މާ ވަރުގަދަކޮށް ކަމަށެވެ.
"މަސައްކަތާއި ދުވުމާއި ބައިސްކަލް ދުއްވުން އަދި ފެތުމަށް ދެން އެނބުރި އަންނާނީ މާ ވަރުގަދަކޮށް،" ޝަމީމް ވިދާޅުވި އެވެ.