ތައުލީމީ އާ މަންހަޖުގެ ދަށުން އެކުލަވާލި ކީސްޓޭޖް ދޭއްގެ ދަރިވަރުންނަށް ގުރުއާން ހަތިމްކޮށްދޭ ޕްރޮގްރާމެއް އިސްލާމިކް މިނިސްޓްރީ އާއި އެޑިއުކޭޝަން މިނިސްޓްރީ ގުޅިގެން ފަށައިފި އެވެ. - ކީސްޓޭޖް ދޭއަކީ ގްރޭޑް ހަތަރެއް އަދި ފަހެކެވެ. -
މާލެ ސަރަހައްދުގައި ހިމެނޭ ސްކޫލްތަކުގައި މިއަހަރު ފަށާ އެ ޕްރޮގްރާމުގައި މާލޭގެ 15 ސްކޫލަކުން ވަނީ ބައިވެރިވެފައެވެ. އެ ސްކޫލްތަކުގައި ގްރޭޑް ހަތަރެއްގައި ކިޔަވާ ކުދިންގެ ތެރެއިން 900 ކުދިން ބައިވެރިވި އެވެ.
ކީރިތި ގުރުއާނަށާއި އިސްލާމްދީނަށް، ކިޔަވާ ކުދިންގެ ހިތުގައި އޮންނަ ލޯބި އިތުރުކުރުމުގެ ގޮތުން ފަށާފައިވާ އެ ޕްރޮގްރާމުގައި އައްމާ ފޮތުގެ ސޫރަތްތައް ކުދިން ލައްވައި ހިތުން ދަސްކުރުވައި، ތަޖުވީދުގެ ހަމަތަކަށް ގުރުއާން ކިޔަވަން ދަސްކޮށްދިނުމާ އެކު ކީރިތި ގުރުއާން ހަތިމް ކުރުން ހިމެނެ އެވެ. ދެ އަހަރުގެ މުއްދަތަށް ކުރިއަސް ގެންދާ އެ ޕްރޮގްރާމުގައި، މިއަހަރު ބައިވެރިވި ކުދިން 2017ގެ ނިޔަލަށް ތަޖުވީދުގެ ހަމަތަކާ އެކު ގުރުއާން ކިޔަވަން ދަސްކޮށް ހަތިމް ކުރާނެ އެވެ.
އެ ޕްރޮގްރާމް އަތޮޅުތަކުގެ ރަށްރަށުގައި ފަށަން ހަމަޖެހިފައިވަނީ އަންނަ އަހަރު އެވެ. ކޮންމެ އަހަރަކުވެސް ޕްރޮގްރާމުގައި ބައިވެރި ކުރާނީ ގްރޭޑް ހަތަރެއްގެ ދަރިވަރުންނެވެ.
ޕްރޮގްރާމް ފެށުމަށް މިއަދު އިސްލާމިކް މިނިސްޓްރީގައި ބޭއްވި ރަސްމިއްޔާތެއްގައި ދެ މިނިސްޓްރީން ވަނީ ބައިވެރިވި \ސްކޫލްތަކަށް ހަނދާނީ ލިޔުން ދީފަ އެވެ. ސްކޫލްތަކަށް ހަނދާނީ ލިޔުން ހަވާލުކޮށްދެއްވީ އެޑިއުކޭޝަން މިނިސްޓަރު ޑރ. އައިޝަތު ޝިހާމް އާއި، އިސްލާމިކް މިނިސްޓަރު ޑރ. އަހުމަދު ޒިޔާދު އެވެ.
މިނިސްޓަރު ޑރ. އައިޝަތު ޝިހާމް ސްކޫލްތަކަށް ސެޓްފިކެޓް ހަވާލުކޮށްދެއްވަނީ --