ރާއްޖޭގައި އޯގަން ޓްރާންސްޕްލާންޓް ކުރުން ނުވަތަ ގުނަވަން އިންދުމުގެ ހިދުމަތް ފެށުމަށް ކަމާ ގުޅޭ ބިލެއް އެކުލަވާލުމުގެ މަސައްކަތް ފަށައިފި އެވެ.
ނޫސްވެރިންނަށް މިއަދު މައުލޫމާތު ދެއްވަމުން ހެލްތު މިނިސްޓަރު ޑރ. އަބްދުﷲ ހަލީލް ވިދާޅުވީ ގުނަވަން އިންދުމުގެ އޮޕަރޭޝަނަކީ މިއަދު ވަރަށް ފުޅާކޮށް އެކި ގައުމުތަކުގައި ކުރާ ކަމަކަށްވީ ނަމަވެސް އެކަން ކުރަނީ ގާނޫނީ އުސޫލުތަކެއްގެ ތެރެއިން ކަމަށެވެ.
މިނިސްޓަރު ވިދާޅުވީ ރާއްޖޭގައިވެސް ގުނަވަން އިންދުމުގެ އޮޕަރޭޝަން ކުރާނަމަ އެކަމަށް ގާނޫނީ އޮނިގަނޑެއް ބޭނުންވާނެ ކަމަށެވެ. އެހެންވެ ކަމާ ގުޅޭ ބިލެއް އެކުލަވާލުމުގެ މަސައްކަތް ކުރިއަށްދާ ކަމަށް ވިދާޅުވި އެވެ.
"އަޅުގަނޑުމެން މި ބަލަނީ އަލަށް އަންނަ މަޖިލީހުގެ ތެރެއިން [މިބިލް] ވުޖޫދު ކުރެވޭނެ ކަމަށް," މިނިސްޓަރު ވިދާޅުވި އެވެ.
ހަލީލް ވިދާޅުވީ ރާއްޖޭގައި ގުނަވަން އިންދުމުގެ އޮޕަރޭޝަން ފެށުމަށް އަމިއްލަ ހޮސްޕިޓަލްތަކުގެ ޝައުގުވެރިކަން އެބަހުރި ކަމަށެވެ. އެހެންކަމުން ކަމާ ގުޅޭ ގާނޫނެއް އައުމާ އެކު މިފަދަ އޮޕަރޭޝަންތައް ރާއްޖޭގައިވެސް ފެށިގެންދާނެ ކަމުގައި ވިދާޅުވި އެވެ.
މިނިސްޓަރު ވިދާޅުވީ ދިވެއްސަކު ގުނަވަން އިންދުމުގެ އޮޕަރޭޝަނެއް ކޮންމެހެން ކުރަންޖެހޭ ހާލަތުގައި އެމީހެއްގެ ސިއްހީ ފަރުވާއަށް ދޭންޖެހޭ އެހީތެރިކަމެއް ސަރުކާރުން ދޭނެ ކަމަށެވެ.
ރާއްޖޭގައި ގުނަވަން އިންދުމުގެ އޮޕަރޭޝަން ފެށުމަށް ބޭނުންވާ ކަމަށް ހުޅުމާލޭގައި ހިންގާ އެންމެ ބޮޑު އަމިއްލަ ހޮސްޕިޓަލް -- ޓްރީ ޓޮޕް ހޮސްޕިޓަލުން ކުރިން ބުނެފައިވެ އެވެ. ހިދުމަތް ފެށުމަށް ގާނޫނީ އޮނިގަނޑެއް ބޭނުންވާ ކަމަށް އެ ހޮސްޕިޓަލުން ވެސް ބުނެފައިވެ އެވެ.