މިއަދު ފާހަގަކުރަމުންދާ ދުނިޔޭގެ މުވާސަލާތާއި މައުލޫމާތުގެ ދާއިރާގެ ދުވަސް ފާހަގަކުރުމަށް ދިރާގުން ހަރަކާތްތަކެއް ކުރިއަށް ގެންގޮސްފި އެވެ.
ދިރާގުގެ ހަރަކާތްތައް ކުރިއަށް ގެންދިއުމަށްޓަކައި ގައުމީ ޔުނިވާސިޓީގައި ބޭއްވި ޕެނަލް ޑިސްކަޝަނެއްގައި އެ ކުންފުނީގެ ސީއީއޯ އަދި މެނޭޖިން ޑިރެކްޓަރު އިސްމާއިލް ރަޝީދާއި ކޮމިއުނިކޭޝަން އޮތޯރިޓީ އޮފް މޯލްޑިވްސް (ކޭމް)ގެ ޗީފް އެގްޒެކެޓިވް އިލްޔާސް އަހްމަދުވެސް ބައިވެރިވެވަޑައިގެންނެވި އެވެ.
ދިރާގުން ބުނީ މިސެޝަންގެ މަގުސަދަކީ އިލްމު ހިއްސާކޮށް، ކުރިއަށް އޮތް ތަނުގައި ލީޑަރުން ބާރުވެރިކުރުވުމާއި ކުރިއަށް އޮތް ޖީލުތަކަށް ޑިޖިޓަލް ވަސީލަތްތައް ތައާރަފްކޮށް އޭގެ ބޭނުންތައް ބުނެދިނުން ކަމަށެވެ.
"އަޅުގަނޑުމެން ވައުދުވަނީ ޑިޖިޓަލް އިނޮވޭޝަންގެ ބާރު ބޭނުންކޮށްގެން މުޖުތަމައަށް ހެޔޮ އަސަރުތަކެއް އުފެއްދުމަށް. އަޅުގަނޑުމެން ކުރިއަށްދާނީ ޑިޖިޓަލް އިންފްރާސްޓްރަކްޗާ، ޕްލެޓްފޯމް އަދި ޓޫލްސް ގާއިމުކުރަމުން،" ދިރާގުގެ ސީއީއޯ އިސްމާއިލް ރަޝީދު ވިދާޅުވި އެވެ.
ކޭމްގެ ޗީފް އެގްޒެކެޓިވް އިލްޔާސް އަހްމަދު ވިދާޅުވީ ޒުވާނުންގެ އާ ހިޔާލުތަކާއި އީޖާދުތަކާ އެކު ބިރު ނުގަނެ ކުރިއަށް ދާންޖެހޭ ކަމަށެވެ.
މި ޕެނަލް ޑިސްކަޝަންގައި ބައިވެރިވެ ވާހަކަ ދެއްކެވި ހުރިހާ ބޭފުޅުންވެސް ވަނީ މި ދާއިރާ ކުރިއަށް ގެންދިއުމަށްޓަކައި ދެމެހެއްޓެނިވި ގޮތްތައް ބޭނުންކުރުމުގެ މުހިއްމު ކަމާ ގުޅޭގޮތުން ވާހަކަދައްކަވާފަ އެވެ.