"ދަނޑުވެރި ނަފާ" ލޯނު ސްކީމްގެ ދަށުން މި އަހަރުގެ އެޕްރީލް މަހުގެ ނިޔަލަށް 13 މިލިއަން ރުފިޔާގެ ލޯނު ދޫކޮށްފި އެވެ.
އެގްރިކަލްޗާ މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމުގައި އެ މިނިސްޓްރީގެ ސްޓޭޓް މިނިސްޓަރު މަރިޔަމް ވިޝާމާ ވިދާޅުވި ގޮތުގައި ލޯނުގެ ތެރެއިން އަށް މިލިއަން ރުފިޔާ ދޫކޮށްފައިވަނީ ވިޔަފާރިތަކަށެވެ. އަދި ހަތަރު މިލިއަން ރުފިޔާ ދޫކޮށްފައިވަނީ އަމިއްލަ ފަރުދުންނަށެވެ.
މިއީ އެސްޑީއެފްސީއާ ގުޅިގެން ހިންގާ ލޯނު ސްކީމެކެވެ.
މީގެ އިތުރުން އދ. އޮމަދޫ އާއި ދ. ދަރަނބޫދޫގައި ހައިޑްރޯފޯނިކްސް ފާމިން ސިސްޓަމް ގާއިމުކުރުމުގެ މަސައްކަތް ކުރަމުންދާ ކަމަށް އެގްރިކަލްޗާ މިނިސްޓްރީން ބުނެ އެވެ.
މި މަޝްރޫއުގެ ދަށުން މި ދެ ރަށުން ކޮންމެ ރަށެއްގެ 10 ދަނޑުވެރިއަކަށް ހައިޑްރޯފޯނިކްސް ސިސްޓަމް ފޯރުކޮށްދޭނެ ކަމަށް ސްޓޭޓް މިނިސްޓަރު ވިޝާމާ ވިދާޅުވި އެވެ.
އެ ގޮތުން ކޮންމެ ދަނޑުވެރިއަކަށް 50 ލެޓިއުސް އިންދޭ ސިސްޓަމަކާއި ކިއުކަމްބާ މެލަންގެ 25 ގަސް ހެއްދޭ ސިސްޓަމެއް ފޯރުކޮށްދޭނެ ކަމަށް ވިދާޅުވި އެވެ.
އޭނާ ވިދާޅުވި ގޮތުގައި މިހާރު ކުރިއަށްދަނީ މަޝްރޫއުގެ ޕްރޮކިއުމެންޓް މަސައްކަތްތަކެވެ.
