ރާއްޖޭގައި ވަޒީފާ އަދާކުރާ ބިދޭސީ މަސައްކަތްތެރިންގެ ފީގެ ގޮތުގައި 1.7 ބިލިއަން ރުފިޔާ ދައުލަތަށް ނުލިބި އެބަހުރި ކަމަށް ހޯމްލޭންޑް މިނިސްޓްރީން ބުނެފި އެވެ.
އެ މިނިސްޓްރީން ކުރި އިއުލާނެއްގައި ބުނީ ރާއްޖޭގައި ވަޒީފާ އަދާކުރާ ބިދޭސީންނާއި ގުޅިގެން ދޫކުރާ ހުއްދަތަކަށް ވަޒީފާއާބެހޭ ގާނޫނާއި ރާއްޖޭގައި ބިދޭސީން ވަޒީފާއަދާކުރުމާބެހޭ ގަވާއިދުގެ ދަށުން ދައްކަންޖެހޭ ފީތަކާއި ޖޫރިމަނާތައް ވަޒީފާދޭ 10،619 ފަރާތެއްގެ ނަންމަތީގައި ރަޖިސްޓަރީ ކޮށްފައިވާ 102،807 ބިދޭސީ މަސައްކަތްތެރިއެއްގެ ފީ ދައުލަތަށް ލިބިފައިނުވާ ކަމަށެވެ.
މި ބިދޭސީ މަސައްކަތްތެރިންގެ ފީގެ ގޮތުގައި ޖުމްލަ 1.76 ބިލިއަން ރުފިޔާ ދައުލަތަށް ނުދައްކާ ހުރިކަން އެ މިނިސްޓްރީން ވަނީ ފާހަގަކޮށްފަ އެވެ.
ވަޒީފާ އަދާކުރާ ބިދޭސީންނާއި ގުޅިގެން ވަޒީފާ ދޭ ފަރާތައް ގާނޫނުން ލާޒިމުކުރާ އެންމެހާ ފީތަކާއި ޖޫރިމަނާތައް މިމަހުގެ 18 ވަނަ ދުވަހުގެ ކުރިން ދެއްކުމަށް އެ މިނިސްޓްރީން ވަނީ އަންގާފަ އެވެ.
މި މުއްދަތުގައި ފީތަކާއި ޖޫރިމަނާތައް ނުދައްކާ ފަރާތްތައް އާންމުކޮށް އިއުލާނުކުރާނެ ކަމަށާއި އެކްސްޕެޓް ސިސްޓަމް މެދުވެރިކޮށް އެ ފަރާތްތައް ސަސްޕެންޑްކޮށް އާ ހުއްދަތައް ދޫކުރުން މެދުކަނޑާލާނެ ކަމަށްވެސް އެ މިނިސްޓްރީން ވަނީ ބުނެފަ އެވެ.