ރައްޔިތުންގެ މަޖިލީހުގެ އުނގޫފާރު ދާއިރާގެ ކުރީގެ މެންބަރު ޑރ. އަފްރާޝީމް އަލީ އަވަހާރަ ކޮށްލުމުގެ ކުށް ސާބިތުވެ މެރުމަށް ހުކުމް ކޮށްފައިވާ ހުސައިން ހުމާމްގެ މައްސަލާގެ އިބްތިދާއީ އަޑުއެހުންތައް ސުޕްރީމް ކޯޓުގައި ފަށައިފި އެވެ. ހުމާމުގެ މަރުގެ ހުކުމް ސުޕްްރީމް ކޯޓުގައި އިލްތިމާސްކުރީ، ޕީޖީއިންނެވެ.
ޑރ. އަފްރާޝީމް އަވަހާރަކޮށްލުމުގެ ކުށް ސާބިތުވެ ހުމާމަށް މަރުގެ ހުކުމް ކްރިމިނަލް ކޯޓުން އިއްވީ 2014 ވަނަ އަހަރުގެ ޖެނުއަރީ މަހުގެ 16 ވަނަ ދުވަހު އެވެ. ކްރިމިނަލް ކޯޓުގެ މި ހުކުމް ހައިކޯޓުގައި އިސްތިއުނާފުކުރުމުން އެ ކޯޓުން ވެސް ވަނީ އެ ހުކުމަށް ތާއިދުކޮށް ހުމާމް މަރަން ހުކުމް ކޮށްފަ އެވެ. އެއީ މިދިޔަ އަހަރުގެ ސެޕްޓެމްބަރު މަހުގެ ހަތްވަނަ ދުވަހު އެވެ.
އަޑުއެހުމަށް ހުމާމް މިއަދު ސުޕްރީމް ކޯޓަށް ހާޒިރުކުރިއިރު، މިއަދު އޮތީ ދެ ފަރާތުގެ ވެސް ލިޔުންތައް ބަދަލުކުރުމެވެ.
ދައުލަތުން މި މައްސަލަ ސުޕްރީމް ކޯޓުގައި އިލްތިމާސްކުރީ، ހައިކޯޓުން ނިންމާ މައްސަލަތައް ސުޕްރީމް ކޯޓުގައި އިސްތިއުނާފް ކުރަން އޮންނަ މުއްދަތުގައި ހުމާމްގެ ފަރާތުން އެ މައްސަލަ ހުށަހަޅާފައިނުވާތީ އެވެ. ޕީޖީއިން ސުޕްރީމް ކޯޓުގައި އެދިފައިވަނީ ހުމާމުގެ މަރުގެ ހުކުމް ކަށަވަރުކުރުމަށެވެ.
މަޝްހޫރު ދީނީ އިުމްވެރިޔާ އަފްރާޝީމް އަވަހާރަކޮށްލާފައި ވަނީ 2012 އަހަރުގެ އޮކްޓޯބަރު މަހުގެ ފުރަތަމަ ދުވަހުގެ ރޭ 11:30 އާއި ދަންވަރު 2:00 އާ ދެމެދުގެ ވަގުތެއްގައި އަފްރާޝީމް ދިރިއުޅުއްވާ ގޭގެ ސިޑީގެ ކައިރިންނެވެ.
ހުމާމު މިއަދު ސުޕްރީމް ކޯޓަށް ހާޒިރުކުރަނީ - އަވަސް ފޮޓޯ: މުހައްމަދު އަޒާން