މަސްވެރިންނަށް ވި ވައުދު ނުފުއްދި މި ސަރުކާރު ބޮޑުތަނުން ފެއިލްވެފައިވާ ކަމަށް އެމްޑީޕީން ބުނެފި އެވެ.
މިފްކޯއަށް މަސްވެރިން ކިރާ މަހަށް ލިބެންޖެހޭ ފައިސާ ވަގުތުން ވަގުތަށް ހަމަޖައްސައިދިނުމަށް ގޮވާލާ ރައްޔިތުންގެ މަޖިލީހަށް މަރަދޫ ދާއިރާގެ މެންބަރު އަހުމަދުދީދީ މިއަދު ހުށަހެޅުއްވި ކުއްލި މައްސަލައިގެ ބަހުސްގައި މަޖިލީހުގެ މައިނޯރިޓީ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ވިދާޅުވީ ކިރާ މަހަށް 48 ގަޑިއިރުގެ ތެރޭގައި ފައިސާ ދޭނެ ކަމަށް ވިވައުދު ނުފުއްދޭ ކަމަށެވެ.
"ސަރުކާރު ބޮޑުތަނުން ފެއިލްވެއްޖެ. 48 ގަޑިއިރު 48 ދުވަހަށް ބަދަލުވެ ދެންވާނީ 400 ވަރަކަށް ދުވަހަށްހެން އަޅުގަނޑަށް ހީވަނީ،" ނާޒިލް ވިދާޅުވި އެވެ.
ނިމިދިޔަ އެމްޑީޕީގެ ސަރުކާރުން މަސްވެރިންނަށް ނުދީ ހުރި ފައިސާތަކެއް މި ސަރުކާރަށް ވާރުތަވި ކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެފައިވާތީ ނާޒިލް ވަނީ އެކަމަށް ރައްދު ދެއްވާފަ އެވެ.
"މިނިސްޓަރު ވިދާޅުވަނީ ވާރުތަކުރި އަދަދުގެ ވާހަކަ. 200 މިލިއަން ރުފިޔާ ވާރުތަކުރީ ހުސް ބިލެއް ނޫން. ސްޓޯރޭޖްގައި ހުރި މަހާއެކީގައި،" ނާޒިލް ވިދާޅުވި އެވެ.
ނާޒިލް ވިދާޅުވީ ސްޓޯރޭޖްގައި ހުރި މަސް ވިއްކާލުމުން 270 މިލިއަން ރުފިޔާ ލިބޭނެ ކަމަށެވެ.
"ބިލްތަކުގެ އަދަދު 200 މިލިއަން. 70 މިލިއަން ފައިދާ. ކޮބާތޯ އެލާރި،" ނާޒިލް ސުވާލު ކުރެއްވި އެވެ.
ނާޒިލް ވިދާޅުވީ ސަރުކާރުން އޮޅުވާލަން މަސައްކަތްކުރާ ކަމަށާއި މަސްވެރިންނަށް ކަންކަން ސާފު ކަމަށެވެ.