ރައްޔިތުންގެ މަޖިލީހުގެ މެންބަރުންގެ އަދަދު ކޮންމެ ފަސް އަހަރަކުން އިތުރުވަމުންދާ ދިއުމާމެދު މެންބަރުން ދެކޭ ގޮތެއް ދެނެގަތުމަށް މަޖިލީހަށް ހުށަހެޅި ގަރާރުގެ ބަހުސް ފަށައިފި އެވެ.
މަޖިލީހަށް މި ގަރާރު ހުށަހެޅުއްވީ ބާރަށު ދާއިރާގެ މެންބަރު އިބްރާހީމް ޝުޖާއު އެވެ.
މި ގަރާރު މަޖިލީހަށް ތައާރަފުކޮށްފައިވަނީ މިދިޔަ މަހުގެ 26 ވަނަ ދުވަހު ބޭއްވި ޖަލްސާގަ އެވެ. މަޖިލީހުގެ މިއަދުގެ ޖަލްސާގައި ވަނީ މި ގަރާރުގެ ބަހުސް ފަށާފަ އެވެ.
ގަރާރުގައި ވަނީ 17 ވަނަ ރައްޔިތުންގެ މަޖިލީހުން ފެށިގެން ރާއްޖޭގައި އިންތިހާބު ކުރެވުނު ރައްޔިތުންގެ މަޖިލީސްތަކުގެ މެންބަރުންގެ އަދަދު ކޮންމެ ފަސް އަހަރަކުން އިދާރީ ދާއިރާތަކުގެ އާބާދީ އިތުރުވަމުން އަންނަ ނިސްބަތުން އިތުރުވަމުންކަން ފާހަގަކޮށްފަ އެވެ.
ގާނޫނު ހަދާ މަޖިލީހަށް ކޮންމެ ފަސް އަހަރަކުން މެންބަރުން އިތުރުވަމުންދާ ދިއުމަށް މަޖިލީހުން ހައްލެއް ހޯދަންޖެހޭ ކަމަށްވެސް ޝުޖާއުގެ ގަރާރުގައި ބުނެފައިވެ އެވެ.
މި މައްސަލައަށް ހައްލެއް ހޯދުމަށް ބައެއް އިސްލާހުތައް މީގެ ކުރިންވެސް މަޖިލީހަށް ހުށަހެޅި ކޮންމެވެސް ވަރަކަށް ބަހުސް ކުރެވިފައިވާކަން ޝުޖާއުގެ ގަރާރުގައި ފާހަގަކޮށްފައިވެ އެވެ.
މަޖިލީހުގެ މެންބަރުންގެ އަދަދަށް އައި ބަދަލު
- 17 ވަނަ މަޖިލިސް: 77 މެންބަރުން
- 18 ވަނަ މަޖިލިސް: 85 މެންބަރުން
- 19 ވަނަ މަޖިލިސް: 87 މެންބަރުން
- 20 ވަނަ މަޖިލިސް: 93 މެންބަރުން
ޝުޖާއު ހުށަހެޅުއްވި ގަރާރުގައި ބުނެފައިވަނީ އާންމުކޮށް ކޮންމެ ރިޔާސީ އިންތިހާބެއްގައިވެސް މަޖިލީހުގެ މެންބަރުންގެ އަދަދު މަދުކުރަން ނުވަތަ އެއްވަރެއްގައި ހިފެހެއްޓުމާ ގުޅޭ ގޮތުން ވާހަކަ ދެކެވޭ ކަމަށެވެ.
ނަމަވެސް އެއަށް އަމަލީ ސިފަ ނާންނަ ކަމަށާއި މަޖިލީހުގެ މެންބަރުންގެ އަދަދާ ގުޅޭ ގޮތުން މަޖިލީހުގައި ބަސްހުކޮށް މެންބަރުން ދެކޭ ގޮތް ހާމަކުރުމަށް މި ގަރާރު ހުށަހެޅީ ކަމަށް ބުނެފައިވެ އެވެ.