ނެޝަނަލް ޑްރަގް އެޖެންސީ (އެންޑީއޭ)ގެ ސީއީއޯގެ މަގާމުގައި ހުންނެވި އިމާދު ސޯލިހް އެ މަގާމުން ވަކިކޮށްފި އެވެ.
އެންޑީއޭގެ ބޯޑުގެ ބައްދަލުވުމެއް ބޭއްވުމަށްފަހު އިމާދު މަގާމުން ވަކިކުރީ ބޯޑު މެންބަރުންގެ އިއްތިފާގުންނެވެ.
އެންޑީއޭގެ ބޯޑުގައި ހިމެނޭ ބޭފުޅަކު ނަން ނުޖެހުމަށް ޝަރުތުކޮށް އަވަސްއަށް ވިދާޅުވީ އިމާދު މަގާމުން ވަކިކުރީ މަސްތުވާތަކެއްޗާ ބެހޭ ގާނޫނުގައި އެންޑީއޭ އިން ކުރަން ލާޒިމުކޮށްފައިވާ މަސައްކަތްތައް އެކަށީގެންވާ ވަރާ ގާތަށްވެސް ކުރެވިފައި ނުވާތީ ކަަމަށެވެ.
އޭނާ ވިދާޅުވީ މަސްތުވާތަކެތީގެ މައްސަލަތައް ހައްލުކުރުމަށް ސަރުކާރުން ވަރަށް ބޮޑު އިސްކަމެއް ދޭ ކަމަށާއި އިމާދުއާ އެކު އެ މަސައްކަތް ކުރެވޭނެ ކަމަށް ބޯޑުގެ މެންބަރުންނަށް ގަބޫލުނުކުރެވޭ ކަމަށެވެ.
އެންޑީއޭގެ ސީއީއޯގެ މަގާމު ހުސްކޮށް އޮންނަތާ 17 މަސް ދުވަަސް ފަހުން އޭނާ އެ މަގާމަށް އައްޔަންކުރީ މިދިޔަ ސަރުކާރުގައި ނޮވެމްބަރު 1، 2022 ގައެވެ.
އެންޑީއޭ މިދިޔަ ސަރުކާރުގައި އެންމެ ފުރަތަމަ ހިންގީ ޖެންޑާ މިނިސްޓްރީގެ ދަށުންނެވެ. އޭގެފަހުން ހެލްތު މިނިސްޓްރީގެ ދަށަށްވެސް ބަދަލުކުރި އެވެ. އެކަމަކު މިސަރުކާރުގައި ޑްރަގުގެ މައްސަަލަ އަކީ ގައުމީ ސަލާމަތާ ގުޅުންހުރި މައްސަލައެއް ކަމަށް ބަލައި، އެންޑީއޭ ވަނީ ހޯމްލޭންޑް ސެކިއުރިޓީ މިނިސްޓްރީގެ ދަށަށް ބަދަލުކޮށްފަ އެވެ.
