ދެ މީހަކު އާޓިފިޝަލް ބީޗުގައި ހުރި ދޫނި ކޮށްޓެއްގެ "ހައްޔަރުކުރި" މައްސަލަ ފުލުހުން ބަލަން ފަށައިފި އެވެ.
ފުލުހުންގެ މީޑިއާ އޮފިޝަލް ވިދާޅުވީ ސޯޝަލްމީޑިއާގައި މިހާރު ދައުރުވަމުންދާ މި ވީޑިއޯ ފުުލުހުންގެ ސަމާލުކަމަށް އައިސްފައިވާތީ އެކަމާ ގުޅޭގޮތުން ބަލަންޖެހޭ ކަންކަން ބަލަމުންދާ ކަމަށެވެ.
ވީޑިއޯއިން ފެންނަނީ ދޫނި ކޮށްޓެއްގެ ތެރޭގައި ހުސްގަޔާ ހުރި ދެ ފިރެހެނަކު "ހައްޔަރުކޮށްފައި" ތިބި މަންޒަރެވެ.
ވީޑިއޯގައި ދައްކާ ވާހަކަ ސާފު އެހާ ސާފުނުވި ނަމަވެސް އެނގިފައިވާ ގޮތުގައި އެ ދެމީހުން ބަންދުކޮށްފައިވަނީ ރެސްޓޯރެންޓަކުން ކެއުމަށްފަހު ބިލް ނުދެއްކި މައްސަލައިގައެވެ.
ސޯޝަލް މީޑިއާގައި ބައެއް މީހުން ވަނީ މި ދެ މީހުންނަކީ ރަހީނުކޮށްގެން ގެންގުޅޭ ބައެއްތޯ ސުވާލުވެސް ކޮށްފަ އެވެ. އަދި މިއީ ގަބޫލުކުރެވޭނެ ފަދަ އަމަލެއް ނޫން ކަމަށްވެސް ބައެއް މީހުން ބުނެފައިވެ އެވެެ.
