އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ)އަށް މިޔަންމާގައި ހިންގަމުންދާ ގަތުލުއާންމު ހުއްޓުވުމަށް ހުށަހަޅާފައިވާ މައްސަލައަށް ތަދައްޚުލްވުމަށް ރާއްޖެއިން އިންޓަވެންޝަނެއް ހުށަހެޅުމުން އައިސީޖޭ އިން އެ ހުށަހެޅުން ބަލައިގެންފި އެވެ.
މިޔަންމާގައި ވެރިކަން ކުރާ ހުދުމުހުތާރު އަސްކަރީ ސަރުކާރުން އެ ގައުމުގައި ދިރިއުޅޭ ބައި މަދު ރޮހިންޔާ ނަސްލުގެ މުސްލިމުންނާ ދެކޮޅަށް ހިންގަމުންދާ ގަތުލުއާންމު ހުއްޓުވުމަށް އައިސީޖޭއަށް މައްސަލަ ހުށަހެޅީ ގެމްބިއާ އިންނެވެ.
މިޔަންމާ ސަރުކާރާ ދެކޮޅަށް ނޮވެމްބަރު 11، 2019 ގައި ހުށަހަޅާފައިވާ މިމައްސަލައަށް ތަދައްޚުލްވުމަށް ދިވެހި ސަރުކާރުން ހުށަަހަޅާފައިވާ ހުށަހެޅުން އައިސީޖޭގެ ފަނޑިޔާރުންގެ އިއްތިފާގުން ބަލައިގަތީ މިމަހުގެ ތިންވަނަ ދުވަހު އެވެ.
އެގޮތުން، ގަތުލުއާންމުގެ ކުށް ހުއްޓުވުމާއި އަދަބު ދިނުމާ ގުޅޭ މުއާހަދާގެ މާއްދާތައް މާނަކުރުމާ ގުޅޭގޮތުން ރާއްޖޭގެ ހުށަހެޅުމުގައި ހުރި ކަންކަމަކީ އައިސީޖޭއަށް ބެލޭނެ ކަންކަން ކަމަށްވެސް އެ ކޯޓުން ނިންމާފައިވެ އެވެ.
އައިސީޖޭ އިން މިގޮތަށް ނިންމާފައި މިވަނީ ރާއްޖޭގެ އިންޓަވެންޝަން ބަލައިގަތުމާ މެދު މިޔަންމާ އިން އިއުތިރާޒެއް ހުށަހަޅާފައި ވަނިކޮށެވެ.
ބަންޑާރަނައިބް އޮފީހުން ބުނީ ރޮހިންޖާގެ މުސްލިމުންނަށް އަދުލު އިންސާފު ހޯދައިދިނުމަށާއި ގަތުލުއާންމުގެ ކުށް ހުއްޓުވުމާއި އަދަބު ދިނުމާ ގުޅޭ މުއާހަދާ ތަންފީޒު ކުރުމަށް ބައިނަލްއަގްވާމީ މައިދާނުގައި ކުރާ މަސައްކަތްތަކަށް ރާއްޖެއިން އަބަދުވެސް އެއްބާރުލުން ދިނުމުގައި ސާބިތުކަމާ އެކު އޮންނާނެ ކަމަށެވެ.