ވިޒިޓް މޯލްޑިވްސް ޕްރޯ 2024 -- ބޮޑީބޯޑިންގް ވޯލްޑް ޓުއާގެ ޑިޖިޓަލް ޕާޓްނަރެއްގެ ގޮތުގައި ދިރާގުން ސޮއިކޮށްފި އެވެ.
މިއީ ދިރާގުން މި މުބާރާތުގެ ޕާޓްނަރުކަން ޖެހިޖެހިގެންކުރާ ތިންވަނަ އަހަރެެވެ.
މި މުބާރާތް ބާއްވަނީ އިންޓަނޭޝަނަލް ބޮޑީބޯޑިންގް ކޯޕަރޭޝަން (އައިބީސީ) އާއި މޯލްޑިވްސް ބޮޑީބޯޑިންގް އެސޯސިއޭޝަން (އެމްބީބީއޭ) ގުޅިގެންނެވެ. މިއީ އައިބީސީ ވޯލްޑް ޓުއާގެ މޯލްޑިވްސް ޕްރޯ ސީރީޒްގެ ތިންވަނަ އެޑިޝަން އެވެ.
މުބާރާތުގެ ޑިޖިޓަލް ޕާޓްނަރުގެ ގޮތުގައި ސޮއިކުރުމުގެ ރަސްމިއްޔާތުގައި ދިރާގުގެ ޑިރެކްޓާ، ބްރޭންޑް އެންޑް ކޮމިއުނިކޭޝަންސް، މުހައްމަދު މިރްޝާން ހަސަން ވިދާޅުވީ ވިޒިޓް މޯލްޑިވްސް ޕްރޯ 2024 -- ބޮޑީބޯޑިންގް ވޯލްޑް ޓުއާގެ ޑިޖިޓަލް ޕާޓްނަރުގެ ގޮތުގައި މުބާރާތަށް އެއްބާރުލުން ދިނުމަކީ ލިބޭ ވަރަށް ބޮޑު އުފަލެއް ކަމަށެވެ.
އެ ގޮތުން މުބާރާތަށް ހައި ސްޕީޑް ޑިޖިޓަލް ކަނެކްޓިވިޓީ ފޯރުކޮށްދީ، ދިވެހި އެތުލީޓުންގެ ހުނަރު ބައިނަލްއަގުވާމީ އޯޑިއަންސަށް ފޯރުކޮށްދިނުމަކީ ލިބޭ އުފަލެއް ކަމަށް މިރްޝާން ވިދާޅުވި އެވެ.
އެމްބީބީއޭގެ ރައީސް ހުސެއިން ނާޒިމް ވަނީ މުބާރާތަށް ދިރާގުން ފޯރުކޮށްދޭ އެހީތެރިކަމަށް ޝުކުރު އަދާކުރައްވާފަ އެވެ.
އެ ގޮތުން ފާއިތުވި ދެ އަހަރުގެ މުބާރާތް ކާމިޔާބުކަމާއެކު ކުރިއަށް ގެންދެވުނީ ދިރާގުގެ އެހީތެރިކަމާއެކު ކަމަށް ވިދާޅުވި އެވެ.
މި މުބަރާތް ބޭއްވުމަށް ހަމަޖެހިފައިވަނީ މިއަދުން ފެށިގެން މިމަހުގެ ނުވަ ވަނަ ދުވަހުގެ ނިޔަލަށް މާލެ، ވަރުނުލާ ރާޅުގަނޑު ސަރަހައްދުގަ އެވެ.
ދިރާގުން ބުނި ގޮތުގައި އެ ކުންފުނިން އަބަދުވެސް މަސައްކަތް ކުރަމުންދަނީ ރާއްޖޭގެ ކުޅިވަރުގެ ދާއިރާ އިތުރަށް ހަރުދަނާކޮށް ތަފާތު ކޮމިއުނިޓީ އެންގޭޖްމަންޓް ހަރަކާތްތައް ކުރިއަށް ގެންދިއުމަށެވެ.