އިޒުރޭލަށް ހަމަލާދިނުމަށް އީރާންގެ ލީޑަރު އަލީ ޚާމަނާއީ އަސްކަރިއްޔާއަށް އަންގަވައިފި ކަމަށް ނިއުޔޯކް ޓައިމްސް އިން ބުނެފި އެވެ.
އިޒުރޭލަށް ހަމަލާދިނުމުގައި ވިސްނަންޖެހޭ ކަންތައް ވިލަރެސްކުރުމަށް އިސްލާމިކް ރިވޮލިއުޝަނަރީ ގާޑް ކޯޕްސްއަށް ޚާމަނާއީ އެންގެވި ކަމަށްވެސް ނިއުޔޯކް ޓައިމްސް އިން ބުނެ އެވެ.
ޚާމަނާއީ އެންގެވި ކަންތައްތަކުގެ ތެރޭގައި އީރާނަށް މަދަދުވެރިވާ ހަނގުރާމަވެރި ގުރޫޕްތައް ގުޅިގެން އިޒުރޭލަށް ހަމަލާދިނުމަކީވެސް އޮތް އިޚްތިޔާރެއް ކަމަށް -- މިކަމުގެ މައުލޫމާތު ހުރި މީހުން ބުނި ކަމަށް ވެސް އެމެރިކާގެ ނޫހުން ވަނީ ބުނެފަ އެވެ.
އީރާނުން ސީދާ އިޒުރޭލަށް ހަމަލާދީފިނަމަ އިޒުރޭލު ދިފާއުކުރަން އެމެރިކާ ނުކުންނާނެކަން ކަށަވަރު ކަމަށްވެސް އޮފިޝަލުން ވިދާޅުވެ އެވެ. މިފަދަ ހާލަތައްގައި، ހަމަލާތަކައިގެން އީރާން ކުރިއަށް ދާނެ ގޮތެއް -- އިޒުރޭލަށް ހަމަލާދިނުމުގެ ކުރިން ރާވާފައި އޮތުން ބޭނުންތެރި ކަމަށް ޚާމަނާއީ އެންގެވި ކަމަށްވެސް ޚަބަރުތައް ބުނެ އެވެ.
އިޒުރޭލުގެ ކިބައިން ބަދަލުހިފުމަކީ އީރާންގެ އަބަދުގެ ވައުދެކެވެ. އީރާންގެ ޖެނެރަލުންނާއި ކޮމާންޑަރުން މެރުމުގެ ފަހަތުގައި އަބަދުވެސް އޮންނަނީ އިޒުރޭލެވެ. މި ސަބަބަށްޓަކައި އިޒުރޭލުވެފައި އޮންނަނީ އީރާންގެ އެންމެ ބޮޑު ދުޝްމަނަށެވެ.
އީރާނުން ސީދާ އިޒުރޭލަށް ހަމަލާދިނުމަށް މިގޮވާލީ ލުބްނާންގައި ހަރަކަތްތެރިވާ ހިޒްބުﷲގެ ހަނގުރާމަވެރިންނަށް ހަމަލާދީ އެ ޖަމާއަތުގެ ކޮމާންޑަރެއް ކަމަށްވާ ފުއާދު ޝުކޫރު މަރާލުމާ ގުޅިގެންނެވެ. އަދި އީރާންގެ ދައުވަތަަކަށް ވަޑައިގެން ހުއްޓައި ހަމާސްގެ ލީޑަރު އިސްމާއިލް ހަނިއްޔާ މަރާލީ އިޒުރޭލު ކަމަށްވާތީ ބަދަލުހިފުމަކީ ވާޖިބެއް ކަމަށް އީރާން ގަބޫލުކުރާތީ އެވެ.
