ހުޅުމާލޭގެ މަގުތަކުގެ ޕޭވްމަންޓް މަތީގައި ގޮނޑި މޭޒު ބަހައްޓައިގެން ކެފޭގެ ހިދުމަތް ނުދިނުމަށް އަނެއްކާވެސް އަންގައިފި އެވެ.
އެޗްޑީސީ އިން މިދިޔަ ޖުލައި 23 ވަނަ ދުވަހު ނެރުނު އެންގުމެއްގައިވެސް ވަނީ ހުޅުމާލޭގެ މަގުތަކުގެ ޕޭވްމަންޓް މަތީގައި ގޮނޑި މޭޒު ބަހައްޓައިގެން ކެފޭގެ ހިދުމަތް ނުދިނުމަށް އަންގާފަ އެވެ.
އެޗްޑީސީ އިން މިއަދު ނެރުނު އިތުރު އިއުލާނެއްގައި ވަނީ ކުރީގެ އެންގުމާ އެއްގޮތަށް އަދިވެސް ބައެއް ފަރާތްތަކުން އަމަލުކޮށްފައި ނުވާތީ މަގުތަކުގެ ޕޭވްމަންޓް މަތީގައި ބަހައްޓާފައިވާ ގޮނޑި މޭޒު މިމަހުގެ 10 ވަނަ ދުވަހުގެ ކުރިން ނެގުމަށް އަންގާފަ އެވެ.
މިމުއްދަތަށްފަހު އެޗްޑީސީ އިން އެ ތަކެތި ނަގާނެ ކަމަށާއި ތަކެތި ނަގާއިރު ލިބޭ ގެއްލުމަށް ޒިންމާ ނުވާނެ ކަމަށްވެސް ބުނެފައިވެ އެެވެ.
އެޗްޑީސީ އިން އިތުރަށް ބުނީ ބުނީ މަގުތަކަކީ ކުދި ބޮޑު އެންމެން ބޭނުންކުރާ ތަނަކަށްވާތީ ޕޭވްމަންޓުތަކުގައި ގޮނޑި މޭޒު ބަހައްޓައި، ކެފޭ އުސޫލުން ހިންގައި އެތަންތަނުގައި ދުންފަތުގެ އިސްތިއުމާލުކުރުން ފަދަ އަމަލުތައް ކުރުމުގެ ސަބަބުން އޭގެ އަސަރު މުޅި މުޖްތަމައަށް ކުރާ ކަމަށެވެ. އެހެންވެ ހުރިހާ ފަރާތްތަކުންވެސް މިކަންކަމަށް ސަމާލުވެ، ވިޔަފާރިތައް ކުރަން ހުއްދަ ދީފައިވާ ގޮތަށް އަދި އާންމުނަށް އުނދަގޫނުވާނެހެން ކަންކަން ބައްޓަންކުރުމަށްވެސް އެދިފައިވެ އެވެ.