މަޖީދީ މަގު އޮލިމްޕަސް ކައިރީ ދެ ވަޅި ހިފައިގެން އުޅުނު މީހަކު ޖަލަށްލާން ހުކުމްކޮށްފި އެވެ.
މަޖީދީމަގުގައި ވަޅިއެއް ހިފައިގެން އުޅުނު މައްސަލައިގައި ޖަލަށްލާން ހުކުމްކޮށްފައިވަނީ، ހދ. މަކުނުދޫ ލުބޯގަސްދޮށުގޭ، ހުސައިން މަހީލް އެވެ. އޭނާގެ މައްޗަށް މިދިޔަ ހަފްތާގައި މި ހުކުމް ކުރީ މަކުނުދޫ ކޯޓުންނެވެ.
މިއީ މިދިޔަ އަހަރުގެ ޑިސެމްބަރު މަހު، މަޖީދީމަގުގައި ވަޅިއެއް ހިފައިގެން މަހީލް އުޅުނު މައްސަލަ އެވެ.
މި މައްސަލައިގައި ދައުލަތުން މަހީލްގެ މައްޗަށް އުފުލާފައިވަނީ މަގުބޫލު ސަބަބެއް ނެތި އާއްމު ތަނެއްގައި ތޫނު އެއްޗެހި ގެންގުޅުމުގެ ކުށުގެ ދައުވާ އެވެ.
ކުރިންވެސް ކުށުގެ ރެކޯޑް އޮންނަ މަހީލްގެ މި މައްސަލައިގެ ޝަރީއަތް ނިމުނު ގޮތުގެ ރިޕޯޓުން އެނގޭ ގޮތުގައި އޭނާ ދެ ވަޅި ގެންގުޅުނެވެ.
މަހީލް އަތުގައި ވަޅިއެއް އޮތްކަން ފުލުހުންނަށް އެނގުނީ، ޕެޓްރޯލް ކުރުމުގެ ތެރޭގައި އޭނާ ފެނުމުން، އޭނާ އުޅުނު ގޮތުން ޝައްކު ވެގެން ފުލުހުން ބެލި ބެލުމުންނެވެ.
މި މައްސަލައިގައި ކުށް ސާބިތުވެ އޭނާގެ މައްޗަށް އިއްވާފައިވަނީ ހަ މަސް ދުވަހުގެ ޖަލު ހުކުމެކެވެ.