ނ. އަތޮޅުގައި މަސްތުވާތަކެއްޗާ ދެކޮޅަށް ފުލުހުން އޮޕަރޭޝަނެއް ފެށުމާ ގުޅިގެން އެ އަތޮޅު ހެނބަދޫގައި ފުލުހަކު ގެންގުޅޭ ސައިކަލެއްގައި ރޯކޮށްލި މައްސަލައިގައި ދެ މީހަކު ހައްޔަރުކޮށްފި އެވެ.
މި މައްސަލައިގައި ހައްޔަރުކޮށްފައިވަނީ 33 އަހަރުގެ ދެ ދިވެހި ފިރެހެނުންނެވެ. އެއީ ނ. ހެނބަދޫ، ސެލްވިޔޯ، އިލްޔާސް އިބްރާހިމާއި، ނ. ހެނބަދޫ، ހުދުތަރި، މުހައްމަދު އިރުޝާދެވެ.
ފުލުހުންގެ މީޑިއާ އޮފިޝަލް ވިދާޅުވީ އެމީހުން ހައްޔަރުކޮށްފައިވަނީ އެ ރަށު ޕޮލިސް ޕޯސްޓުގައި މަސައްކަތްކުރާ ފުލުހުންނާއި އެ ފުލުހުންގެ އާއިލާތަކާއި މުދަލަށް ގެއްލުންދޭނެ ކަމަށް ބުނެ އިންޒާރު ދިނުމާއި، ފުލުހުންގެ ސައިކަލަކަށް ގެއްލުންދީ، ފުލުހެއްގެ ސައިކަލުގައި އަލިފާން ރޯކޮށްލި މައްސަލައާ ގުޅިގެން ކަމަށެވެ.
ފުލުހެއްގެ ސައިކަލްގައި ރޯކޮށްލި ނަމަވެސް މަސްތުވާތަކެއްޗާ ދެކޮޅަށް ކުރިއަށް ގެންދާ އޮޕަރޭޝަންތަކަށް އެއްވެސް ހުއްޓުމެއް ނައިސް ކުރިއަށްދާނެ ކަމަށްވެސް ފުލުހުން ބުނެފައިވެ އެވެ.