ބަންގުލަދޭޝްގައި ޖުލައި ކުރީކޮޅު ފެށި ހަމަނުޖެހުންތަކުގެ ރާގު ބަދަލުވެ ބޮޑުވަޒީރު ޝައިޚް ހަސީނާ ވެރިކަމުން ބޭލުމަށް މުޒާހަރާކުރާ މީހުން ވެރިރަށް ޑާކާއަށް މިސްރާބު ޖަހަނީ އެވެ.
މުޒާހަރާކުރާ މީހުން ބުނާ ގޮތުން އެ މީހުންގެ ޝަކުވާތަކަށް އެކަށީގެންވާ އިޖާބައެއް ނުލިބިއްޖެނަމަ ހާލަތު ދެންވެސް ވާނީ ގޯހެވެ.
ސަރުކާރުން ސިވިލް ސާވިސްގެ ވަޒީފާއަށް މީހުން ނެގުމުގައި ތަފާތުކުރާ ކަމަށް ބުނެ ދަރިވަރުން ފެށި މަދަނީ ބަސްނޭހުން މިހާރު އޮތީ "މާޗް ޓު ޑާކާ"ގެ ނަމަށް ބަދަލުކޮށްފަ އެވެ.
މި ހަރަކާތުގައި ވެރިރަށް ޑާކާއަށް އަރާ ގޮތަށް އޮތީ މި ހަފްތާގެ އަންގާރަ ދުވަހު އެވެ. ނަމަވެސް ހަރަކާތް އަވަސްކޮށް މާދަމާއަަށް ބަދަލުކުރީ އެވެ.
ހަބަރުތައް ބުނާ ގޮތުން ބަންގުލަދޭޝްގައި ބޭންކްތައް ވެސް ތިން ދުވަހަށް ވަނީ ބަންދުކޮށްފަ އެވެ. ސްކޫލްތަކުގައި ކިޔަވައިދިނުމަށް ސްޕްރީމް ކޯޓުން އަމުރުކުރި ނަމަވެސް\ ދަރިވަރުންނަށް ލިބިދާނެ އަނިޔާއަކާށް ބިރުން ސްކޫލްތައް އަދިވެސް ނުހުޅުވަ އެވެ.
ބަންގުލަދޭޝްގެ ހަމަނުޖެހުންތަކުގައި މުޒާހަރާކުރާ މީހުން ވަނީ ފަސް ފޮތި ފިހާރައެއްގައި ހުޅުޖަހައި އަންދާލާފަ އެވެ. އަދި ޕްލާސްޓިކް ކަންވާރު އުފައްދާ ކާރުހާނާއެއްގައި ވެސް ވަނީ ރޯކޮށްލާފަ އެވެ.
އާންމުގެންގެ ތެރެއަށް އަމަން ބެލެހެއްޓުމަށްޓަކައި ވަދެގަތް ފުލުހުންގެ ތެރެއިން ލަޓިބުރިން ތަޅައި އޮފިސަރުންތަކެއް ވަނީ މަރާފަ އެވެ. އަދި ފުހުލުންގެ މަރުކަޒކަށް ދިން ހަމަލާއެއްގައި 13 ފުލުހަކު ވަނީ މަރާލާފަ އެވެ.
އާންމުގެ މި ހަމަނުޖެހުންތަކާ ގުޅިގެން ސަރުކާރު ތިން ދުވަހަށް ބަންދުކޮށް މަގުތައް ބެލެހެއްޓުމަށް ސިފައިން ވަނީ ނެރެފަ އެވެ.
ބަންގްލަދޭޝްގެ ހަމަނުޖެހުންތަކުގައި 283 އަށް ވުރެ ގިނަ މީހުން މަރުވެފައި ވާނެ ކަމަށް ހަބަރުތައް ބުނެ އެވެ. ފުލުހުން ބުނާ ގޮތުން މަރުވި މީހުންގެ އަދަދު މިއަށް ވުރެވެސް އިތުރުވާނެ އެވެ.
މި ހަމަނުޖެހުންތަކާ ގުޅިގެން ބަންގުލަދޭޝްގައި އުޅޭ ބޭރު ގައުމުތަކުގެ މީހުން މަގުތަކަށް ނުނިކުތުމަށް އެ ގައުމުތަކުން ވަނީ އިލްތިމާސްކޮށްފަ އެވެ. އަދި ބޭރު ގައުމުގެ ސަފީރުންނާއި އޮފިޝަލުންގެ ރައްކާތެރިކަން ކަށަވަރުކުރުމަށް ސިފައިންގެ އެހީތެރިކަމަށް އެ ގައުމުތަކުން ވަނީ އެދިފަ އެވެ.