އެމްއެމްއޭ އަކީ ޒަމާނީ ސެންޓްރަލް ބޭންކަކަށް ހެދުމަށާއި ހެޔޮ ނަތީޖާ ނެރޭ ބޭންކަކަށް ހެދުމަށްޓަކައި އެތަނުގެ އޮނިގަނޑަށް ބަދަލުތަކެއް ގެނެސްފި އެވެ.
އެމްއެމްއޭގެ އޮފިޝަލަކު ވިދާޅުވީ މި ބަދަލުތަކުގެ ސަބަބުން އެމްއެމްއޭ އިން ކުރަމުންދާ މަސައްކަތްތައް މިހާރަށްވުރެ ހަރުދަނާވެ އަދި ހެޔޮ ނަތިޖާތަކެއް ނެރުމަށް ފަސޭހަވާނެ ކަމަށެވެ.
އެމްއެމްއޭގެ އޮނިގަނޑަށް ގެނައި ބަދަލުތަކުގެ ތެރޭގައި އެސިސްޓެންޓް ގަވަރުނަރުގެ މަގާމު ވަނީ މެނޭޖިން ޑިރެކްޓަރު މަގާމަށް ބަދަލުކުރުމަށް ނިންމާފަ އެވެ.
އެސިސްޓެންޓް ގަވަރުނަރުންގެ ގޮތުގައި މިހާރު ތިއްބެވި ބޭފުޅުން ވަނީ އެޑްވައިޒަރުންގެ މަގާމަށް ޕްރޮމޯޓްކޮށްފަ އެވެ.
އޮފިޝަލް ވިދާޅުވީ އެމްއެމްއޭގައި މަސައްކަތްކުރާ ތައުލީމީ އަދި ތަޖުރިބާކާރު ފަރާތްތަކަށް ފުރުސަތު ފުޅާކުރުމުގެ ގޮތުން އަލަށް ހުޅުވާލާ މެނޭޖިން ޑިރެކްޓަރ މަގާމަކީ ފަސް އަހަރުގެ ދެ ދައުރަކަށް ހޮވޭ މަގާމަކަށް ވަނީ ބަދަލުކޮށްފައި ކަމަށެވެ.
މި މާގާމުތަކަށް ކުރިމަތިލުމުގެ ފުރުސަތު އެމްއެމްއޭގައި މަސައްކަތް ކުރާ މުވައްޒަފުންގެ އިތުރުން އާންމުންނަށްވެސް ހުޅުވާލެވޭނެ ކަމަށް އޮފިޝަލް ވިދާޅުވި އެވެ.
މީގެ ސަބަބުން އެމްއެމްއޭގައި މިހާރު ތިބި ގާބިލް ފަރާތްތަކަށް އާ ފުރުސަތުތައް ހުޅުވިގެންދާނެ. އަދި ފަންނީ ގާބިލް މީހުންނަށް އެމްއެމްއޭ އަށް ވަނުމަށްވެސް ފުރުސަތު ހުޅުވިގެންދާނެ،" އޭނާ ވިދާޅުވި އެވެ.
އެމްއެމްއޭގެ އޮނިގަނޑަށް ބަދަލުތަކެއް ގެންނަން ނިންމާފައި މިވަނީ އެމްއެމްއޭގެ ބޯޑުގެ މަޝްވަރާގެ މަތިން މަރުކަޒީ ބޭންކްގެ އާ ގަވަރުނަރު އަހްމަދު މުނައްވަރު އެވެ.