ދައުލަތުގެ ކަމާ ގުޅޭ އިދާރާތަކުގެ މެދުގައި އިންޓެލިޖެންސް މައުލޫމާތު ހިއްސާކުރުމުގައި ހުރި މައްސަލަތަކަށް އަދިވެސް ހައްލެއް ހޯދިފައި ނެތްކަން ހާމަވެއްޖެ އެވެ.
އިންޓެލިޖެންސް މައުލޫމާތު ހިއްސާކުރަންޖެހޭ ސަލާމަތީ އިދާރާތަކުގައި އެފަދަ މައުލޫމާތުތައް ހިއްސާކުރާނެ ހަރުދަނާ އުސޫލެއް ނެތުމުން މައުލޫމާތު ހިއްސާކުރުމުގައި މައްސަލަތަކެއް ހުރިކަން އެންމެ ފުރަތަަމަ ހާމަވީ ރައްޔިތުންގެ މަޖިލީހުގެ ކުރީގެ ރައީސް މުހައްމަދު ނަޝީދަށް އަމާޒުކޮށް މެއި 6، 2021 ގައި ދިން ހަމަލާއަށްފަހު މަޖިލީހުގެ 241 ކޮމިޓީން ހެދި އިންކުއަރީގެ ތެރެއިންނެވެ.
މަޖިލީހުގެ 241 ކޮމިޓީގައި މިއަދު ވާހަކަދައްކަވަމުން އެ ކޮމިޓީގައި ނެޝަނަލް ކައުންޓާ ޓެރަރިޒަމް ސެންޓަރު (އެންސީޓީސީ)އިން ދައްކާފައިވާ ވާހަކަތަކަކާ ހަވާލާދެއްވާ މަޖިލީހުގެ ނައިބް ރައީސް އަހްމަދު ނާޒިމު ވިދާޅުވީ އިންޓެލިޖެންސް މައުލޫމާތު ހިއްސާކުރުމާއި އެކަން ކޯޑިނޭޓް ކުރުމުގައި ހުރި މައްސަލަތަކަށް ހައްލެއް އައިސްފައި ނުވާ ކަމަށެވެ.
ނާޒިމު ވިދާޅުވީ އިންޓެލިޖެންސް މައުލޫމާތު ހިއްސާކުރުމުގައި ހުރި މައްސަލަތައް ހައްލުކުރުމާ ގުޅޭގޮތުންނާއި އެ މައްސަލަ ހައްލުކުރުމަށް ކަމާ ގުޅޭ އިދާރާތަކަށް އެންގުމަށް ކޮމިޓީގައި މަޝްވަރާ ކުރެވުނު ކަމަށެވެ.
ނާޒިމުގެ ވާހަކަތަކާ ގުޅިގެން 241 ކޮމިޓީގެ މުގައްރިރު އޭދަފުށި ދާއިރާގެ މެންބަރު އަހްމަދު ސަލީމު ވިދާޅުވީ މިމައްސަލައިގައި ކޮމީޓީން އަންގަންޖެހޭ އެންގުންތަކަށް ކަމާ ގުޅޭ އިދާރާތަކަށް ސިޓީއަކުން އަންގާނެ ކަމަށެވެ.
ނަޝީދަށް ދިން ހަމަލާ އާއި ގުޅިގެން އެ ދުވަސްވަރު ސިފައިންނާއި ފުލުހުންގެ އިސްވެރިން މަޖިލީހުގެ 241 ކޮމިޓީއަށް ހާޒިރުކުރުމުން އެއް އިދާރާ އިން އަނެއް އިދާރާއަށް ތުހުމަތުކޮށް ޒިންމާ އިން ރެކެން މަސައްކަތް ކޮށްފައިވެ އެވެ. އަދި އިންޓެލިޖެންސް ހިއްސާކުރާނެ ގޮތާއި ހިއްސާކުރާނެ މައުލޫމާތަކާ މެދު އިދާރާތަކުގެ މެދުގައި ބޮޑެތި ހިޔާލުތަފާތުވުންތަކެއް ހުރިކަންވެސް އޭރު ހާމަވެގެން ދިޔަ އެވެ.
ރައީސް ނަޝީދަށް ދިން ހަމަލާއާއި ގުޅިގެން ބަޔަކަށް ޓެރަރިޒަމްގެ ދައުވާ ކުރި ނަމަވެސް މިހާތަނަށް ކުށް ސާބިތުވީ އެންމެ މީހެއްގެ މައްޗަށެވެ.