މެދުއިރުމަތީގައި ބޮޑު ހަނގުރާމައެއް ފެށިދާނެތީ އޮގަނައިޒޭޝަން ފޯ އިސްލާމިކް ކޯޕަރޭޝަން (އޯއައިސީ) އިން ބާއްވާ ހާއްސަ ބައްދަލުވުމުގައި ބައިވެރިވެވަޑައިގަތުމަށް ފޮރިން މިނިސްޓަރު މޫސާ ޒަމީރު ސައުދި އަރަބިއްޔާއަށް ވަޑައިގަންނަވާ ގޮތަށް ހަމަޖެހިއްޖެ އެވެ.
ސައުދި އަރަބިއްޔާގެ ޖިއްދާގައި ވަޒީރުންގެ ފެންވަރުގައި މާދަމާ ފަށާ ބައްދަލުވުމަށް މިނިސްޓަރު ޒަމީރު ފުރާވަޑައިގަތުމަށް ހަމަޖެހިފައިވަނީ މިރޭގެ ވަގުތެއްގައެވެ.
އޯއައިސީގެ މިބައްދަލުވުމުގެ އެޖެންޑާގައި ހިމެނޭ މައިގަނޑު މައްސަލަތަކަކީ އިޒުރޭލުން ފަލަސްތީންގެ ޣައްޒާގައި ދެމުންދާ ލާއިންސާނީ ހަމަލާތަކާއި، އިރާނާއި އިޒުރޭލާ ދެމެދު ހަނގުރާމައެއް ފެށިއްޖެނަމަ އޯއައިސީގެ ގައުމުތަކުން ކަންކަން ކުރާނެ ގޮތަކާ މެދު މަޝްވަރާކުރުމެވެ.
އޯއައިސީގެ މިބައްދަލުވުމުގެ އެޖެންޑާގައި ހިމެނޭ މައްސަލަތަކާ ގުޅޭގޮތުން ދިވެހި ސަރުކާރުން ދެކޭ ގޮތްތައް މިނިސްޓަރު ޒަމީރު ދެއްވާ ތަގުރީރުގައި ހާމާކުރެއްވުމަށްވެސް ހަމަޖެހިފައިވެ އެވެ.
މެދުއިރުމަތީގެ ހާލަތު ވަރަށް ބޮޑަށް ގޯސްވެފައި މިވަނީ އިރާންގެ ދައުވަތަކަށް ހަމާސް ޖަމާއަތުގެ ވެރިޔާ އިސްމާއިލް ހަނިއްޔާ އެ ގައުމުގައި ވަޑައިގެން ހުންނަވަނިކޮށް ބޮމުގެ ހަމަލާއެއްދީ އަވަހާރަކޮށްލާފައި ވަނިކޮށެވެ.
އިރާނުން ބުނާ ގޮތުގައި މިއީ އިޒުރޭލުގެ ޖާސޫސީ އިދާރާ -- މޮސާޑުން ރާވާ ތަންފީޒު ކުރި ހަމަލާއެކެވެ. އެހެންވެ އިރާނުން ވަނީ އިޒުރޭލަށް ހަމަލާދާނެ ކަމަށް ބުނެ އިންޒާރު ދީފަ އެވެ.