މަރުކަޒީ ބޭންކް -- އެމްއެމްއޭއަށް ފަސް މެނޭޖިން ޑިރެކްޓަރުން ނެގުމަށް ނިންމާ އެ މަގާމަށް ކުރިމަތިލުމަށް މިއަދު ހުޅުވާލައިފި އެވެ.
އެމްއެމްއޭއިން ކޮށްފައިވާ އިއުލާނެއްގައިވާ ގޮތުން ފަސް މެނޭޖިން ޑިރެކްޓަރުން ހޯދަނީ އެ ބެންކްގެ ފަސް ދާއިރާ އަކަށެވެ. އެއީ - މަނިޓަރީ ޕޮލިސީ / ރިސާޗް އެންޑް ސްޓެޓިސްޓިކްސް، ފައިނޭންޝަލް ސެކްޓާ ޑިވެލޮޕްމަންޓް، ބޭންކިން އޮޕަރޭޝަންސް، ފައިނޭންޝަލް ސްޓެބިލިޓީ އަދި ކޯޕޮރޭޓް ސާވިސަސް އަަށެވެ.
މި މަގާމުތަކަށް ހޮވޭ ބޭފުޅުންނަށް 50،000 ރުފިޔާއާއި 55،000 ރުފިޔާއާ ދެމެދުގެ އަދަދެއް މުސާރަ އާއި އިނާޔަތުގެ ގޮތުގައި ދިނުމަށް ހަމަޖެހިފައިވެ އެވެ.
އިއުލާންގައި ބުނެފައިވަނީ މިމަގާމަށް ތައުލީމީ ގޮތުން ގާބިލް، ހުނަރުވެރި، ތެދުވެރި އަދި އިހްލާސްތެރި ކޮންމެ މީހަކަށްވެސް ކުރިމަތިލެވޭނެ ކަމަށެވެ. ވަކި ޖިންސަކަށް ތަފާތު ކުރުމެއް ނެތް ކަމަށާއި އަދި އެމްއެމްއޭގައި މަސައްކަތް ކުރާ މުވައްޒަފުންނަށްވެސް މިމަގާމަށް ކުރިމަތިލެވޭނެ ކަމަށް އިއުލާންގައިވެ އެވެ.
މެނޭޖިން ޑިރެކްޓަރުގެ މަގާމަށް ހޮވޭ ބޭފުޅުން މި މަގާމަށް އައްޔަންކުރަނީ ފަސް އަހަރަށެވެ.
އެމްއެމްއޭ އަކީ ޒަމާނީ ސެންޓްރަލް ބޭންކަކަށް ހެދުމަށާއި ހެޔޮ ނަތީޖާ ނެރޭ ބޭންކަކަށް ހެދުމަށްޓަކައި އެތަނުގެ އޮނިގަނޑަށް ބަދަލުތަކެއް ގެނައުމަށް އެ ބޭންކްގެ ބޯޑުން ނިންމީ އާ ގަވަރުނަރު އަހްމަދު މުނައްވަރު މަގާމާ ހަވާލުވެވަޑައިގެންނެވި ފަހުންނެެވެ.