މާލޭގެ ގެސްޓްހައުސްއަކަށް ވަދެ ފައިސާއާއި މޯބައިލް ފޯންތަކެއް ފޭރިގެންފި އެވެ.
ފޭރުމުގެ މި އަމަލު ރޭ 9:30 ހާއިރު ހިންގާފައިވަނީ މުއިވެޔޮ މަގުގައި ހުންނަ ގެސްޓްހައުސްއެއް ގައެވެ.
ގެސްޓްހައުސް ވަދެފައިވަނީ ދެ މީހަކު ކަމާއި އެ ތަނުގެ ރިސެޕްޝަންގައި އިން އަންހެން ކުއްޖާއަށް ބިރު ދެއްކުމަށްފަހު އޭނާގެ މޯބައިލް ފޯނާއި ގެސްޓްހައުސްގެ މޯބައިލް ފޯނާއި 2،400 ރުފިޔާ ފޭރިގެންފައިވާ ކަމަށް މައުލޫމާތު ލިބެ އެވެ.
ފޭރުމުގެ އަމަލު ހިންގުމަށް ގެސްޓްހައުސްއަށް ވަދެފައިވާ ދެ ފިރިހެނުންވެސް ތިބީ ވިއްސާރަ ކޯޓު ލައިގެންނެވެ. އެކަކު ބޮލުގައި ތޮފި އަޅައިގެން ހުރިއިރު ދެވަނަ މީހާ ހުރީ ކޯޓުގައި ބޮލަށް މަހާލުމަށް ހުންނަ ބައި ބޮލަށް މަހާލައިގެންނެވެ.
ސީސީޓީވީ ފުޓޭޖުން ފެންނަ ގޮތުގައި ބޮލުގައި ތޮފި އަޅައިގެން ހުރި މީހާގެ މޫނު ސާފުކޮށް ނުފެނެ އެވެ.
ގެސްޓްހައުސްގެ ފަރާތުން މިމައްސަލަ ފުލުހުންނަށް ހުށަހަޅާފައިވީ ނަމަވެސް މައްސަލައިގެ ތުހުމަތުގައި އަދި އެއްވެސް މީހަކު ހައްޔަރުކޮށްފައިވާ ކަމެއް އެނގިފައެއް ނުވެ އެވެ.