ރާއްޖޭގައި އެމްޕޮކްސް ފެތުރޭނެތޯ ބެލުމަށް އެސެސްމަންޓެއް ހަދަން ފަށައިފި އެވެ.
އެފްރިކާގައި އެމްޕޮކްސް ފެތުރެމުންދާއިރު ދުނިޔޭގެ ސިއްހަތު ޖަމިއްޔާ -- ވޯލްޑް ހެލްތް އޯގަނައިޒޭޝަން (ޑަބްލިއުއެޗްއޯ) އިން ރޭ ވަނީ އާންމު ސިއްހަތުގެ ކުއްލި ނުރައްކާ އިއުލާނުކޮށްފަ އެވެ.
އެކަމާ ގުޅިގެން ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ބުނީ އެ ބަލި ރާއްޖޭގައި ފެތުރޭނެތޯ ބެލުމަށް އެސެސްމަންޓެއް ހެދުމަށްފަހު އެކަށީގެންވާ ފިޔަވަޅުތައް އެޅުމަށް އަންގަމުންދާނެ ކަމަށެވެ.
މި ބަލި ފުރަތަމަ ފެތުރެން ފެށީ އެފްރިކާގެ ކޮންގޯގައި ނަމަވެސް އެގައުމު ކައިރި އެހެން ގައުމުތަކަށް ވެސް މި ބަލި ވަނީ ފެތުރެން ފަށާފަ އެވެ.
ޑަބްލިއުއެޗްއޯ އިން ކުއްލި ނުރައްކަލުގެ އެލާޓް ނެރެނީ އެންމެ މަތީ ދަރަޖައިގެ އެލާޓުގެ ގޮތުގަ އެވެ.
އެމްޕޮކްސްއަކީ ގައިން ގަޔަށް އަރާ ބައްޔެކެވެ. ބަލީގެ އަލާމާތްތަކުގެ ތެރޭގައި ރޯގާ ޖެހުން، ގައިގައި ބޮޑު ބިހިތައް ނެގުން، ހުން އައުން އަދި ނޭވާލާ ނިޒާމަށް އުނދަގޫވުން ހިމެނެ އެވެ.