ކުޅިވަރުގެ ޒަމާންވީ ހިދުމަތްތެރިޔާ އަދި ރާއްޖޭގެ އެންމެ ފުރަތަމަ ފީފާ ރެފްރީ މައްލާ ޅަތުއްތު އަވަހާރަވެއްޖެ އެވެ.
ދިވެހިރާއްޖޭގައި އުފެދުނު އެންމެ މޮޅު އެއް ފުޓްބޯޅަ ރެފްރީ މައްލާ ޅަތުއްތު އަވަހާރަވީ ސިއްހީ ހާލު ދެރަވެ އިންޑިއާގެ ޓްރިވެންޑްރަމްގެ ހޮސްޕިޓަލެއްގެ އައިސީޔޫގައި ފަރުވާ ހޯއްދަވަމުން އަންނަނިކޮށް މިއަދު މެންދުރު އެވެ.
މައްލާ އަވަހާރަވުމާ ގުޅިގެން ރައީސް ޑރ. މުހައްމަދު މުއިއްޒު ސޯޝަލް މީޑިއާގައި މިއަދު ވިދާޅުވީ ކުޅިވަރު ކުރިއެރުވުމުގައި ބައި ގަރުނަށްވުރެ ގިނަ ދުވަހު ގައުމަށް ޚިދުމަތްކޮށްދެއްވާފައިވާ މަޝްހޫރު ފުޓްބޯޅަ ރެފްރީ މައްލާ ޅަތުއްތު ނިޔާވުމަކީ، ދިވެހި ކުޅިވަރުގެ ދާއިރާއަށް ފޫނުބެއްދޭނެ ބޮޑު އުނިކަމެއް ކަމަށެވެ.
ރާއްޖޭގެ އެންމެ މަތީ ފަންތީގައި 1969 އިން 1995 އަށް ރެފްރީކަން ކުރެއްވި މައްލާ ފީފާ ބެޖުގައި ރެފްރީކަން ކުރެއްވީ 1990 އިން 1993 އަށެވެ.
މައްލާ ވަނީ އޭޝިއަން ކްލަބް ޗެމްޕިއަންޝިޕާއި، ސާފް ގޭމްސް އާއި، ސްރީލަންކާގެ ފުރަތަމަ ޑިވިޝަނުގައިވެސް ރެފްރީކަން ކުރައްވާފަ އެވެ. އޭނާ ވަނީ ވަރަށް ގިނަ ރެފްރީން ތަމްރީންވެސް ކުރައްވާފަ އެވެ. އެގޮތުން މައްލާގެ ފަހުން ރާއްޖޭގައި އެންމެ ފާހަގަކުރެވުނު ރެފްރީންގެ ތެރޭ ހިމެނޭ އަލީ ސަލީމާއި، އަހްމަދު އަބީރު އިސްމާއިލާއި، އަހުމަދު އަމީޒަކީ މައްލާގެ ދަރިވަރުންނެވެ.
މައްލާއަކީ ކުޅިވަރު ކުރިއެރުވުމުގެ ރޮނގުން ގައުމީ ހިތްވަރުދިނުމުގެ އިނާމާ، ގައުމީ ޝަރަފްވެރިކަމުގެ އިނާމާ އަދި ދައުލަތަށް ދިގު މުއްދަތަކަށް ހިދުމަތްކުރެއްވުމުގެ އިނާމާއި، ކުޅިވަރުގެ ލައިފްޓައިމް އެޗީވްމަންޓް އެވޯޑްވެސް ހާސިލްކުރައްވާފައިވާ ގައުމީ ހިދުމަތުގެ ނަމޫނާ ޝަޚްޝިއްޔަތެކެވެ.