ބިދޭސީން ގެންގުޅޭ ފަރާތްތަކުން ސަރުކާރަށް ދައްކަންޖެހޭ ފީތަކާއި ޖޫރިމަނާތައް ގަވާއިދުން ނުއްދާ ކުންފުނިތަކުން ފީ ދެއްކުމަށް ދިން ފުރުސަތު މިމަހުގެ ނިޔަލަށް އިތުރުކޮށްފި އެވެ.
ބިދޭސީން ގެންގުޅޭ ފަރާތްތަކުން ސަރުކާރަށް ދައްކަންޖެހޭ ފީތަކާއި ޖޫރިމަނާތައް އެއްލައްކައަށްވުރެ މައްޗަށް އަރާފައިވާ ފަރާތްތަކުން، ދައުލަތަށް ދައްކަންޖެހޭ ޖޫރިމަނާ ފައިސާ ދެއްކުމަށް މުހުލަތެއްދީ އެ ފަރާތްތަކުގެ ލިސްޓު ހޯމްލޭންޑް މިނިސްޓްރީން ނެރުނީ މިދިޔަ ޖުލައި މަހުގެ 24 ވަނަ ދުވަހު އެވެ. އޭރު އެ ފަރާތްތަކުން ފީތަކާއި ޖޫރިމަނާތައް ދެއްކުމަށް ފުރުސަތު ދިނީ މިމަހުގެ 12 ވަނަ ދުވަހުގެ ނިޔަލަށެވެ.
ހޯމްލޭންޑް ސެކިއުރިޓީ މިނިސްޓްރީން ނެރުނު ލިސްޓުގައި 1،000 އަށް ވުރެ ގިނަ ކުންފުނި ހިމެނެ އެވެ. މީގެ ތެރޭގައި އެކި ސިނާއަތްތަކުގައި ހަރަކާތްތެރިވާ ބައެއް ބޮޑެތި ކުންފުނިތަކާއި ވަކިވަކި ފަރުދުންވެސް ހިމެނެ އެވެ.
ހޯމްލޭންޑް ސެކިއުރިޓީން މިނިސްޓްރީން މިދިޔަ ބުދަ ދުވަހު ބުނީ ފީތަކާއި ޖޫރިމަނާތައް ދެއްކުމަށް މިމަހު 12 ވަނަ ދުވަހުގެ ނިޔަލަށް ފުރުސަތު ދިނުމުން 182،954،572 ރުފިޔާ އެކި ކުންފުނިތަކުން ދައްކާފއިވާ ކަމަށެވެ. އެކަމަކު އަދިވެސް ބިދޭސީންގެ ފީއާއި ޖޫރިމަނާގެ ގޮތުގައި 453 މިލިއަނެއްހާ ރުފިޔާ ދައުލަތަށް ނުލިބިވާ ކަމަށްވެސް މިނިސްޓްރީން ބުންޏެވެ.
ފީތައް ނުދައްކާ ފަރާތްތަކަށް އިތުރު ފުރުސަތެއް ދިނުމުގެ ގޮތުން ހޯމްލޭންޑް ސެކިއުރިޓީ މިނިސްޓްރީން ވަނީ މިމަހުގެ 31 ވަނަ ދުވަހުގެ ނިޔަލަށް ފީތަކާއި ޖޫރިމަނާތައް ދެއްކުމަށް އިތުރު މުއްދަތެއް ދީފަ އެވެ. މިމުއްދަތުގެ ނިޔަލަށް ފީތަކާއި ޖޫރިމަނާތައް ނުދައްކާ ފަރާތްތަކާ ދެކޮޅަށް ފިޔަވަޅު އަޅާނެކަމުގެ އިންޒާރުވެސް ދީފައިވެ އެވެ. އެގޮތުން އެކްސްޕެޓް ސިސްޓަމުން ދެމުން އަންނަ ހިދުމަތްތައް މެދުކަނޑާލައި، ސަސްޕެންޑް ކުރެވޭނެ ކަމަށް ބުނެފައިވެ އެވެ.
ހޯމްލޭންޑް ސެކިއުރިޓީ މިނިސްޓްރީން އާންމުކުރި ލިސްޓުން އެނގޭ ގޮތުގައި 123 ކުންފުންޏަކުން ދައުލަތަށް ދައްކަން ޖެހޭ އަދަދު މިލިއަނަކަށް ވުރެ ގިނައިރު ބައެއް ކުންފުނިތަކުން ދައްކަން ޖެހޭ ފައިސާގެ އަދަދު 26 މިލިއަނަށް ވުރެ އިތުރެވެ.