ބިދޭސީން ރާއްޖެ ގެނައުމަށް ދޫކުރާ ހުއްދައިގެ ފީއާއި ޖޫރިމަނާގެ ފައިސާ ނުދައްކާ ތިބި 7،500 ފަރާތެއް އެކްސްޕެޓް ސިސްޓަމުން ސަސްޕެންޑުކޮށްފި އެވެ.
ހޯމްލޭންޑް ސެކިއުރިޓީ މިނިސްޓްރީގެ ސްޓޭޓް މިނިސްޓަރު އަބްދުލް މަޖީދު އިބްރާހީމް ވިދާޅުވީ އެކްސްޕެޓް ސިސްޓަމުން މިހާރު ވަނީ ބިދޭސީންގެ ޖޫރިމަނާގެ ފައިސާ ނުދައްކާ ހުރި 7،501 ފަރާތެއް ބްލޮކް ކޮށްފައި ކަމަށެވެ.
މަޖީދު ވިދާޅުވީ ބްލޮކްކޮށްފައިވާ ހުރިހާ ފަރާތްތަކަށްވެސް ނުދައްކާ ހުރި ޕޭމަންޓްތައް ދެއްކުމުން އަލުން ސިސްޓަމަށް ވަދެވޭ ގޮތް ހަދައިދޭނެ ކަމަށެވެ.
މިނިސްޓްރީން މީގެ ކުރިން ވަނީ މި މަހުގެ 16 ވަނަ ދުވަހާ ހަމައަށް ބިދޭސީންނަށް ވަޒީފާ ދޭ ފަރާތްތަކުން ދައުލަތަށް ދައްކަންޖެހޭ ޖޫރިމަނާ ފައިސާގެ އަދަދު ލައްކައަކަށް ވުރެ މަދު ނަމަ އެ ފައިސާ ދެއްކުމަށް އިތުރު ފުރުސަތުވެސް ދީފަ އެވެ. އަދި އެ މުއްދަތުގައި ފައިސާ ނުދައްކައިފިނަމަ އެ ފަރާތްތަކުގެ ލިސްޓެއް އާންމުކުރާނެ ކަމަށާއި އެކްސްޕެޓް ސިސްޓަމުން ސަސްޕެންޑުކުރާނެ ކަންވެސް މިނިސްޓްރީން ކުރިން އެންގި އެވެ.
މިނިސްޓްރީން މައުލޫމާތު ދިން ގޮތުގައި 3،692 ފަރާތަކުން ވަނީ އެއް އަހަރަށް ބަހައިލައިގެން ފައިސާ ދައްކަން އެދިފަ އެވެ. މީގެ ތެރެއިން އެންމެ ބޮޑު އަދަދެއްގެ ފައިސާ ދައްކަންޖެހޭ ފަރާތުން 23.2 މިލިއަން ރުފިޔާ ދައްކަންޖެހޭ ކަމަށާއި އެ ފަރާތަށްވެސް ފައިސާ ދައްކާ ހަލާސްކުރުމަށް އެއް އަހަރު ދުވަސް ދީފައިވާނެ ކަމަށް މިނިސްޓްރީން ބުންޏެވެ.
ރާއްޖޭގައި ބިދޭސީންނަށް ވަޒީފާ ދޭ 50،000 އަށް ވުރެ ގިނަ ފަރާތްތަކުގެ ތެރެއިން 45،000 އަށް ވުރެ ގިނަ ފަރާތްތަކަކީ ގަވާއިދުން ފީ ނުދައްކާ ފަރާތްތައް ކަމަށް ހޯމްލޭންޑް ސެކިއުރިޓީ މިނިސްޓްރީން ބުނެ އެވެ.
އެކްސްޕެޓް ސިސްޓަމަކީ ރާއްޖެއަށް ބިދޭސީން ގެނައުމުގައި ދައްކަންޖެހޭ ހުރިހާ ފީއެއް ދެއްކުމަށް ބޭނުންކުރާ ސިސްޓަމެކެވެ. އެ ސިސްޓަމް ހިންގާ ފަރާތްތަކުގެ އިތުރުން ބިދޭސީންނަށް ވަޒީފާ ދޭ ފަރާތްތަަކާއެކު ހޯމްލޭންޑް ސެކިއުރިޓީ މިނިސްޓަރު އަލީ އިހުސާން ވަނީ ބައްދަލުކުރައްވާފަ އެވެ. އެ ބައްދަލުވުމުގައި ބިދޭސީންގެ މައްސަލައާ ބެހޭގޮތުން ގިނަ މަޝްވަރާތަކެއް ކޮށްފައިވެ އެވެ.