ޓެކްސް އެޕީލް ޓްރައިބިއުނަލްގެ މެމްބަރެއް ކަމަށްވާ އިސްމާއީލް ސާޖިދު ފިޔަވާ އެހެން ހުރިހާ މެމްބަރުން ވަކިކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް ލަފާ ދިނުމަށް ރައްޔިތުންގެ މަޖިލީހުން ފާސްކޮށްފި އެވެ.
މި މައްސަލަ ރައްޔިތުންގެ މަޖިލީހުން ތަޅުމުން މިއަދު ފާސްކޮށްފައިވަނީ 63 މެމްބަރުންގެ އިއްތިފާގުންނެވެ.
ޓެކްސް އެޕީލް ޓްރައިބިއުނަލްގެ މެމްބަރުންގެ މައްސަލަތަކެއް އެންމެ ފުރަތަމަ ހުށަހެޅީ މަޖިލީހުގެ ޖުޑީޝަރީ ކޮމިޓީ އަށެވެ.
މިމައްސަލަ ކޮމިޓީގެ ސަމާލުކަމަށް ގެނައީ ސާޖިދެވެ. ސާޖިދުގެ ސިޓީ އެ ކޮމިޓީއަށް އިއްވާ، ކޮމިޓީން މައްސަލަ ބެލުމަށްފަހު ސާޖިދު ނޫން އެހެން ބޭފުޅުން ޓެކްސް އެޕީލް ޓްރައިބިއުނަލްގެ މެންބަރު ކަމުން ވަކިކުރަން ކޮމިޓީން ފާސްކުރީ މި މަހުގެ 13ވަނަ ދުވަހު އެވެ.
މަޖިލީހުގެ ތަޅުމުން މިއަދު ފާސްކޮށްފައިވަނީ ކޮމިޓީގެ ނިންމުމެވެ.
ޓެކްސް އެޕީލް ޓްރައިބިއުނަލްގައި ހިމެނޭ މެމްބަރުންގެ ތެރެއިން ސާޖިދު ފިޔަވާ ދެން ތިއްބެވި މެންބަރުން ވަކިކުރެއްވުމަށް ކޮމިޓީއަށް ހުށަހެޅުއްވީ ހޮޅުދޫ ދާއިރާގެ މެމްބަރު އަބްދުއްސައްތާރު މުހައްމަދެވެ.
ޓްރައިބިއުނަލުން ވަކިކުރަން ނިންމީ އެ ތަނުގެ ރައީސް މުހައްމަދު މުނައްވަރު އަލީ އާއި، ނައިބު ރައީސް ހުސައިން ޒައިދާން ޖަލީލް އާއި، މެންބަރު އަހްމަދު އަޝްރަފްގެ އިތުރުން މެމްބަރު ހަދީޖާ ނައީމް އެވެ.