ގަވަރުނަރު އަހުމަދު މުނައްވަރު ރާއްޖޭގެ ހުރިހާ ބޭންކްތަކާއި ބައްދަލުކުރައްވައިފި އެވެ.
މިގޮތުން ގަވަރުނަރު ބައްދަލުކުރެއްވި ބޭންކްތަކުގެ ތެރޭގައި ބޭންކް އޮފް މޯލްޑިވްސް، މޯލްޑިވްސް އިސްލާމިކް ބޭންކް، ސްޓޭޓް ބޭންކް އޮފް އިންޑިއާ، ބޭންކް އޮފް ސިލޯން، މޮރޭޝަސް ކޮމާޝަލް ބޭންކް، ކޮމާޝަލް ބޭންކް އޮފް މޯލްޑިވްސް، ހަބީބް ބޭންކް އަދި އެޗްއެސްބީސީ ހިމެނެ އެވެ.
މި ބައްދަލުވުންތަކުގައި ބޭންކްތަކާއި އޮންނަ ގުޅުން މިހާރަށް ވުރެ ރަނގަޅު ކުރުމަށާއި މާލީ ދާއިރާގެ ތަރައްގީއަށް ގުޅިގެން މަސައްކަތްކުރުމަށް މަޝްވަރާކުރެއްވި އެވެ.
އެމްއެމްއޭގެ ގަވަރުނަރުކަމާ ހަވާލުވެވަޑައިގަތުމުގެ ކުރިން ރައްޔިތުންގެ މަޖިލީހުގެ މާލިއްޔަތު ކޮމިޓީއަށް ހާޒިރުވެވަޑައިގެން މުނައްވަރު ވަނީ އޭނާގެ ގަވަރުނަރުކަމުގައި ރާއްޖޭގެ މާލީ ދާއިރާއަށް ވަރަށް ބޮޑު ކުރިއެރުމެއް ގެނެސްދެއްވުމަށް މަސައްކަތް ކުރައްވާނެ ކަމަށް ކުރިން ވިދާޅުވެފަ އެވެ.
މުނައްވަރުގެ އަމާޒަކީ ޖީޑީޕީގެ ނިސްބަތުން މިހާރު މާލީ ދާއިރާ ހިއްސާކުރާ ހަ ޕަސަންޓް، ކުރިއަށް އޮތް ފަސް އަހަރުގެ ތެރޭގައި ދެގުނަ ކުރުމެވެ.
މަގާމާ ހަވާލުވެވަޑައިގަތުމަށްފަހު ރާއްޖޭގެ އިގްތިސާދީ އަދި މާލީ ހާލަތު ރަނގަޅު ކުރުމަށް ގަވަރުނަރު މުނައްވަރު ގެންދަވަނީ އެކި ފަރާތްތަކާއި ގުޅިގެން މަސައްކަތް ކުރައްވަމުންނެވެ.
މަރުކަޒީ ބޭންކްގެ ގަވަރުނަރުގެ މަގާމަށް މުނައްވަރު އައްޔަން ކުރެއްވީ މިދިޔަ ޖުލައި 31 ގައެވެ.