މެދުރާއްޖެތެރޭ ރަށެއްގައި ކެފޭއަކުން އެކި ފަހަރު މަތިން ސަޔާއި ކޮފީ ބުއިމަށް ފަހު ބިލް ނުދައްކާ އުޅުނު މީހެއްގެ މައްޗަށް، ބިލްތައް ދެއްކުމަށް ކޯޓުން ހުކުމެއް ކޮށްފި އެވެ.
މިއީ މާލެ އަތޮޅު ރަށެއްގެ ކެފޭއަކުން ސަޔާއި ކޮފީ ބުއިމަށްފަހު ބިލް ނުދައްކާ އުޅުނު މީހެއްގެ މައްސަލަ އެވެ.
މި މައްސަލަ ރަށު ކޯޓުން ނިންމާފައިވަނީ ދައުވާ ލިބޭ މީހާ ކޯޓަށް ހާޒިރު ނުވުމުން ޣައިރު ހާޒިރުގައެވެ.
ދައުވާ ލިބޭ މީހާ ކެފޭއަށް ދައްކަންޖެހޭ ޖުމްލަ ފައިސާގެ އަގު 12،000 ރުފިޔާއަށް ވުރެ އިތުރެވެ.
މިދިޔަ އަހަރުގެ ކުރީކޮޅު ކޯޓަށް ހުށަހަޅާފައިވާ މިމައްސަލަ ނިމުނު ގޮތުގެ ރިޕޯޓުން އެނގޭ ގޮތުގައި މައްސަލައިގައި ދައުވާ ލިބޭ މީހާއަށް މައްސަލައާއި ގުޅޭ ލިޔެކިޔުންތައް މިދިޔަ އަހަރުގެ މާރިޗު މަހު ވަނީ ހަވާލުކޮށްފަ އެވެ. އެހެންނަމަވެސް އޭނާ މައްސަލައަށް އެއްވެސް ޖަވާބެއް ދީފައި ނުވާކަން މައްސަލަ ނިމުނު ގޮތުގެ ރިޕޯޓުގައި ފާހަގަކޮށްފައިވެ އެވެ.
މި މައްސަލަ ކޯޓުން އިއްޔެ ނިންމާފައިވަނީ އެ މީހާ ދައްކަންޖެހޭ ފައިސާ ދެ މަސް ތެރޭގައި އެއްފަހަރާ ކޯޓަށް ދެއްކުމަށް އަމުރުކޮށްފަ އެވެ.