ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަންގެ ވަޒީފާއަކަށް އެދުނު މުވައްޒަފަކާމެދު ތަފާތު ކުރުން ގެންގުޅެފައިވާ މައްސަލައެއް ވަޒީފާއާބެހޭ ޓްރައިބިއުނަލްއަށް ހުށަހަޅައިފި އެވެ.
މިއީ، ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަންގައި 20 އަހަރަށްވުރެ ގިނަ ދުވަހު މަސައްކަތްކޮށް، އަދި މިހާރުވެސް މަގާމުގައި ހުރި މުވައްޒަފަކު، ހަމަ އެ އިދާރާގެ އެހެން މަގާމަށް ކުރިމަތިލުމުން އޭނާއާ މެދު ތަފާތުކޮށް ވަކި މުވައްޒަފަކަށް މަގާމް ދިނުމަށް މަސައްކަތް ކުރި ކަމަށް ތުހުމަތު ކުރެވޭ މައްސަލައެކެވެ.
މި މައްސަލައިގައި ވަޒީފާއާބެހޭ ޓްރައިބިއުނަލްއަށް ހުށަހަޅާފައިވަނީ، ސީނިއާ ލީގަލް އޮފިސަރެއްގެ މަގާމަށް ކުރިމަތިލީ މުވައްޒަފެއްގެ ތަޖުރިބާގެ ދެ އަހަރު ނެތް ކަމަށް ކަނޑައަޅާފައިވާތީ އެ ކަން ބާތިލުކޮށް، އެ މުވައްޒަފަކީ އެ މަގާމަށް ޝަރުތު ހަމަވާ މީހެއް ކަމަށް ކަނޑައަޅައިދީ އަދި އެކަމާ ގުޅިގެން ދައުވާ ކުރުމުގެ ހައްގު އޮތް ކަމަށް ޓްރައިބިއުނަލްއިން ކަނޑައަޅައިދިނުމަށެވެ.
މި މައްސަލައިގައި ޓްރައިބިއުނަލުންވަނީ މައްސަލަ ހުށަހެޅި ފަރާތާމެދު ތަފާތު ކުރުމެއް ގެންގުޅޭކަން ފާހަގަ ކުރެވިފައިވީނަމަވެސް، ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަނުން ދިފާއުގައި ހުށަހެޅި، ރައްދުގައި ނެގި އިޖުރާއީ ނުކުތާއަށް ބިނާކޮށް މައްސަލަ ބެލުމުގެ އިހުތިސާސް ޓްރައިބިއުނަލަށް ނެތް ކަމަށް ކަނޑައަޅައިފަ އެވެ. ޓްރައިބިއުނަލުން އެ ގޮތަށް ކަނޑައަޅާފައިވަނީ، މައްސަލަ ހުށަހެޅި އިރު ހަވާލާދީފައިވަނީ ގާނޫނުގައި ބުނެފައިވާ މާއްދާއަށް ނޫން ކަމަށް ބުރަވެވޭތީ ކަމަށް ބުނެއެވެ. މި މައްސަލަ ޓްރައިބިއުނަލުން ނިންމީ މިދިޔަ ހަފްތާގައެވެ.
ވަޒީފާއާބެހޭ ވަރަށް ގިނަ މައްސަލަތައް ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަނާ ދެކޮޅަށް ހުށަހެޅޭއިރު، ގާތްގަނޑަކަށް ހުރިހާ މައްސަލައެއްހެން ނިމެނީ އެ ޑިޕާޓްމެންޓާ ދެކޮޅަށެވެ. އެ ޑިޕާޓްމެންޓުން މުވައްޒަފުންނާމެދު އެކި ފަހަރު މަތިން އަޅާފައިވާ ގާނޫނާ ހިލާފު ފިޔަވަޅުތަކުގެ ސަބަބުން ދައުލަތުން އެތައް މިލިއަން ރުފިޔާއެއް ހަރަދު ކުރަން ޖެހިފައިވެއެވެ.
ދާދި ފަހުންވެސް ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަނުން ގާނޫނާ ހިލާފަށް ވަޒީފާއިން ވަކިކޮށްފައިވާ 10 މީހަކަށް އަލުން ވަޒީފާދޭން ސުޕްރީމް ކޯޓުން އަމުރުކޮށްފައިވެއެވެ.