ވިލިމާލެ ހޮސްޕިޓަލްގެ މަސައްކަތްތައް އެހެން ތަނަކަށް ބަދަލުކުރުމަށް ނިންމައިފި އެވެ.
މިގޮތަށް ނިންމާފައިވަނީ ވިލިމާލެ ހޮސްޕިޓަލް ހުރި ތަނުގައި 100 އެނދުގެ ޓާޝަރީ ހޮސްޕިޓަލެއް އެޅުމުގެ އަމަލީ މަސައްކަތް ފެށުމަށް ތައްޔާރުވަމުންދާތީ އެވެ.
ރައްޔިތުންގެ މަޖިލީހުގެ އިޖުތިމާއީ ކޮމިޓީގައި މިއަދު ވާހަކަދައްކަވަމުން ވިލމާލެ ހޮސްޕިޓަލް ހިންގާ މާލޭ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހިމް އަބްދުލްރައްޒާގް ހަލީމް މިއަދު މަޖިލީހުގެ އިޖުތިމާއީ ކޮމިޓީގައި ވާހަކަދައްކަވަމުން ވިދާޅުވީ ވިލިމާލޭގައި 100 އެނދުގެ ހޮސްޕިޓަލް އަޅަން އެންމެ ރަނގަޅު ބިމަކަށް ފެންނަނީ މިހާރުވެސް ހޮސްޕިޓަލް ހުރި ބިން ކަމަށެވެ. އެހެންވެ އެތަނުގައި އާ ހޮސްޕިޓަލް އެޅުމުގެ މަސައްކަތް ފެށޭނީ ބިން ހުސްކޮށްގެން ކަމަށްވާތީ އެ މަސައްކަތް ކަމާ ގުޅޭ އިދާރާތަކާ ގުޅިގެން ކުރިއަށްދާ ކަމަށްވެސް ވިދާޅުވި އެވެ.
"ހޮސްޕިޓަލް އެޅުމުގެ މަސައްކަތް ކުރިއަށްދާއިރު ވިލިމާލެއިން ސިއްހީ ހިދުމަތް މެދުނުކެނޑޭ ގޮތަށް އިންތިޒާމުތައް ހަމަޖައްސާނަން. އެހެން ތަނަކަށް މިހާރު ހުރި ސެޓަޕް ބަދަލުކުރުމުގެ މަސައްކަތް މިހާރު މިވަނީ ރާވާފައި،" އަބްދުއްރައްޒާގް ވިދާޅުވި އެވެ.
ވިލިމާލޭގެ ޓާޝާރީ ހޮސްޕިޓަލްގެ ފީސިބިލިޓީ ހެދުމަށް ޗައިނާ ސަރުކާރުން ހަވާލުކޮށްފައިވަނީ ޗައިނާ އިންޓަނޭޝަނަލް ޑިވެލޮޕްމަންޓް ކޯޕަރޭޝަން އެޖެންސީ އަށެވެ.
ވިލިމާލޭގެ ޓާޝާރީ ހޮސްޕިޓަލާއި އެތަނުގެ ފީސިބިލިޓީ އާއި ޓެކްނިކަލް ދިރާސާ އަކީ ޗައިނާ ސަރުކާރުން ހިލޭ ކޮށްދޭ ކަމެކެވެ. މި މަސައްކަތް ކޮށްދިނުމަށް ޗައިނާ އިން އެއްބަސްވީ ރައީސް ޑރ. މުހައްމަދު މުއިއްޒު ޗައިނާއަށް ކުރެއްވި ފުރަމާނަ ދަތުރުފުޅުގައެވެ.
ހެލްތު މިނިސްޓަރު ޑރ. އަބްދުﷲ ހަލީލް މީގެކުރިން ވިދާޅުވީ ވިލިމާލޭގައި އަޅާ އާ ހޮސްޕިޓަލާ އެކު މާލެ ސަރަހައްދުގެ ސިއްހީ ހިދުމަތްތަކަށް ރަނގަޅު ހެޔޮ ބަދަލުތަކެއް އައިސް އާ ހިދުމަތްތައް ފެށިގެންދާނެ ކަމަށެވެ. ވިލިމާލެ އާ ހޮސްޕިޓަލް ނިމުމުން އެތަނުގައި ޗެރިޓީ ކެއާ ސެންޓަރެއް ހުންނާނެ ކަމަށާއި ދޮށީ އުމުރުގެ މީހުން އެ ތަނުގައި ދުވަސް ކޮޅަކަށް ބައިތިއްބައިގެން އެމީހުންނަށް ދޭންޖެހޭ ފަރުވާ ދެވޭނެ ކަމުގައިވެސް ވިދާޅުވި އެވެ. އަދި ޑައިވިން ކުރާ މީހުންނަށް ދިމާވާ ސިއްހީ މައްސަލަތަކަށް ފަރުވާ ދިނުމަށް ޑިކޮމްޕްރެޝަން ޗެމްބަރެއްވެސް އެ ހޮސްޕިޓަލްގައި ގާއިމުކުރުމަށް ނިންމާފައިވާ ކަމަށް ވިދާޅުވި އެވެ.
މިނިސްޓަރު ހަލީލް ވިދާޅުވީ ވިލިމާލޭގެ އާ ހޮސްޕިޓަލްގެ ޑިޒައިން ވެސް ރާއްޖޭގެ އެހެން ހޮސްޕިޓަލްތަކާ ތަފާތުވާނެ ކަމަށާއި މުޅި ހޮސްޕިޓަލް ވާނީ ތިމާވެށްޓާ ރަށްޓެހި ގޮތަަކަށް ފަރުމާ ކުރެވިފައިވާ ހޮސްޕިޓަލަކަށް ކަމަށެވެ.
"އެހެންވީމާ އެނާޖީ ކޮންސަމްޝަން ތަފާތު ވާނެ. މިތަނުގެ ބައެއް ޑިޒައިންގައި ތަފާތު ހުންނާނެ. ބޭނުންކުރާ ބައެއް އާލާތްތަކުގައި ތަފާތު ހުންނާނެ އާންމުކޮށް އެހެން ހޮސްޕިޓަލްތަކާ. އެހެންވީމާ އެ ހުރިހާ ގޮތަކުން ބަލާއިރުވެސް ވަރަށް ތަފާތު ވިސްނުންތަކެއްގެ މައްޗަށް ބިނާވެގެން ބިނާކުރެވޭ ހޮސްޕިޓަލަކަށް މި ހޮސްޕިޓަލް ވެގެންދާނެ،" ހަލީލް ވިދާޅުވި އެވެ.
ހަލީލް އިތުރަށް ވިދާޅުވީ ތިލަމާލެ ބްރިޖާ އެކު މާލެ ސަރަހައްދު އިތުރަށް ފުޅާވެގެންދާއިރު މާލޭގެ ހުޅަނގަށް އިތުރު ހޮސްޕިޓަލް ބޭނުންވާ ކަމަށެވެ. އެހެންވެ މާލޭގައި ހުޅަނގަށް އިތުރުވާ ގުޅީފަޅާއި ގިރާވަރާ އެކު މިސަރަހައްދުގެ މައި ހޮސްޕިޓަލަކަށް މުސްތަގުބަލްގައި ވާނީ ވިލިމާލޭގައި އަޅާ އާ ހޮސްޕިޓަލް ކަމަށްވެސް ވިދާޅުވި އެވެ.