ކ. ކަނޑުއޮތްގިރީގައި މިފްކޯ އިން ކުރިއަށް ގެންދިޔަ އޮޕަރޭޝަން ހުއްޓާލައި އެތަން ބަންދުކޮށްފި އެވެ.
ނޫސްވެރިންނަށް މިއަދު މައުލޫމާތު ދެއްވަމުން ފިޝަރީޒް މިނިސްޓަރު އަހްމަދު ޝިޔާމް ވިދާޅުވީ ކަނޑުއޮތްގިރިއަކީ މިމަހުގެ ހަތަރުވަނަ ދުވަހުން ފެށިގެން އެމްއެންޑީއެފްްގެ ބޭނުމަށް އެ އިދާރާއާ މިހާރު ހަވާލުކޮށްފައިވާ ކަމަށެވެ.
ޝިޔާމު ވިދާޅުވީ ކަނޑުއޮތްގިރީގައި ކުރަމުން ދިޔަ މަސައްކަތްތައް ކުރުމަށް ހުޅުމާލޭގައި މަސްވެރިން މިހާރުވެސް ކައިރީ ކުރާ ބަނދަރަކާ ދިމާލުން ބިމެއް ލިބޭތޯ ބަލަމުންދާ ކަމަށެވެ. ނަމަވެސް ކަނޑުއޮތްގިރީގައި ކުރި މަސައްކަތް ހުޅުމާލޭގެ ފެށޭނެ ވަކި ދުވަހެއް ޝިޔާމު ވިދާޅުވެފައެއް ނުވެ އެވެ.
"ކަނޑުއޮތްގިރީގައި ދިގު މުއްދަތަކަށް މަސައްކަތްތައް ކޮށްފައިވީ ނަމަވެސް އެ ރަށުން މަސްވެރިންނަށް ބޭނުންވިހައްލުތަކެއް ނުލިބޭ،" ޝިޔާމު ވިދާޅުވި އެވެ.
މިނިސްޓަރު އިތުރަށް ވިދާޅުވި ގޮތުގައި ކަނޑުއޮތްގިރީގައި ކުރަމުން ދިޔަ މަސައްކަތްތައް ހުޅުމާލޭގައި ފެށުމަށްޓަކައި މާލީ އެހީވެސް ހުރީ ލިބިފަ އެވެ.
މިފްކޯ އިން ކަނޑުއޮތްގިރީގައި ކުރި މައިގަނޑު މަސައްކަތަކީ މަސް ކާރުހާނާއެއް ހިންގުމެވެ.
ޝިޔާމް މީގެކުރިންވެސް ވިދާޅުވި ގޮތަށް މިއަދުވެސް ވިދާޅުވީ ކަނޑުއޮތްގިރި އަކީ މަސްވެރިންގެ އަތުން މަސް ގަތުމަށްފަހު ތަފާތު އުފެއްދުންތައް އުފައްދާ ތަނަކަށްވީ ނަމަވެސް މިހާރު އެ ރަށުގެ އެއްގަމު ތޮށި ހަލާކުވުމާއި ބަނދަރު ސަރަހައްދުވެސް ތިލަވެފައިވާތީ އެރަށަށް މަސް ދޯނިތައް ކައިރިކުރަން ބޮޑެތި ދަތިތައް ހުރި ކަމަށެވެ.
"އެހެންވެ ކަނޑުއޮތްގިރި ބަންދުކުރަންޖެހުނީ. އަޅުގަނޑުމެން މިދަނީ އެޗްޑީސީއާ މުއާމަލާތް ކުރަމުން،" ޝިޔާމް ވިދާޅުވި އެވެ.