އެއް މަސް ދުވަހުގެ ތެރޭ އަމިއްލަ ކުންފުންޏަކަށް، ފަސް މިލިއަން ރުފިޔާ ދައްކަން ފެނަކަ ކޯޕަރޭޝަންގެ މައްޗަށް ހުކުމެއް ކޮށްފި އެވެ.
މިއީ، ބ. އޭދަފުށީ ކޭބަލް ޝޮޕުން ފެނަކައަށް ސަޕްލައިކޮށްފައިވާ މުދަލުގެ އަގަށް ދައްކަން ޖެހޭ ފައިސާގެ މައްސަލަ އެކެވެ.
މި މައްސަލަ ނިމުނު ގޮތުގެ ރިޕޯޓުން އެނގޭ ގޮތުގައި ފެނަކައިން، އެ ފިހާރާއިން ހޯދާފައިވާ ނުވަ މިލިއަނެއްހާ ރުފިޔާގެ ތެރެއިން މިހާތަނަށް ނުދައްކައި އޮތް ފަސް މިލިއަން ރުފިޔާ ދައްކަން ޖެހެ އެވެ.
މި ފައިސާ ފެނަކައިން ދައްކަން އެ ކުންފުނީގެ މައްޗަށް މިދިޔަ އަހަރުގެ ކުރީކޮޅު ހުކުމެއް ކޮށްފައި އޮތް ނަމަވެސް އެ ހުކުމާ އެއް ގޮތަށް ފެނަކައިން ފައިސާ ދައްކާފައެއް ނުވެ އެވެ.
ފެނަކައިގެ މައްޗަށް އެ ކުންފުނީގެ ޣައިރު ހާޒިރުގައި މިދިޔަ އަހަރު ކޮށްފައިވާ އެ ހުކުމާ ގުޅިގެން ހަތަރު މިލިއަނެއްހާ ރުފިޔާ މިހާތަނަށް ދައްކާފައިވީ ނަމަވެސް ބާކީ ފަސް މިލިއަން އަދިވެސް ނުދައްކަ އެވެ.
މި މައްސަލައިގައި ފެނަކައިން ކޯޓުގައި އެދިފައިވަނީ މަހަކު ހަތަރު ލައްކަ ރުފިޔާގެ މަގުން ފައިސާ ދައްކައި ހަލާސް ކުރުމަށެވެ. އެހެންނަމަވެސް ދައުވާ ކުރާ ފަރާތުން އެގޮތާ މެދު އެއްބަސް ނުވުމުން ކޯޓުން ހުކުމް ކުރީ އަންނަ ސެޕްޓެމްބަރު މަހުގެ 23 ވަނަ ދުވަހުގެ ކުރިން ބާކީ ފައިސާ އެއްކޮށް ދައްކައި ހަލާސްކުރާށެވެ.