ބޭންކް އޮފް މޯލްޑިވްސް (ބީއެމްއެލް) އިން މިހާރު ދޫކޮށްފައިވާ ޑެބިޓް ކާޑުގެ ޕްރައިމަރީ އެކައުންޓަކީ ދިވެހި ރުފިޔާ އެކައުންޓެއްނަމަ ބޭރު ފައިސާގެ މުއާމަލާތް ކުރުމަށް އެއްވެސް އަދަދެއް ނުލިބޭ ގޮތަށް އެ ބޭންކުން ބަދަލު ގެނެސްފި އެވެ.
އެ ބޭންކުން ބުނީ މިއަދުން ފެށިގެން އަލަށް ދޫކުރާ ޑެބިޓް އަދި ކްރެޑިޓް ކާޑުތައް ކާޑުގެ ޕްރައިމަރީ އެކައުންޓަކީ ދިވެހި ރުފިޔާ އެކައުންޓެއް ނަމަ ބޭރު ފައިސާގެ މުއާމަލާތް ކުރުމަށް އެއްވެސް އަދަދެއް ނުލިބޭނެ ކަމަށެވެ.
މީގެ އިތުރުން މިހާރު ދޫކޮށްފައިވާ ސްޓޭންޑަޑް އަދި ގޯލްޑް ކްރެޑިޓް ކާޑުތަކުން މަހެއްގެ މައްޗަށް ކުރެވޭ ރާއްޖޭން ބޭރުގެ މުއާމަލާތްތައް 100 ޑޮލަރަށް ދަށްކޮށްފައިވާ ކަމަށްވެސް ބީއެމްއެލް އިން ބުނެ އެވެ.
ބީއެމްއެލް އިން ބުނި ގޮތުގައި ޔޫއެސް ޑޮލަރު އެކައުންޓަށް އަލަށް ދޫކުރާ ކާޑާއި މިހާރުވެސް ބީއެމްއެލް ޑެބިޓް ކާޑު ގެންގުޅޭ ކަސްޓަމަރުންނަށް ބޭރުގެ މުއާމަލާތް ކުރުމަށް ކާޑު ބޭނުންކުރެވޭނެ އެވެ.
އެ ބޭންކުން ބުނި ގޮތުގައި މިހާތަނަށް ދޫކޮށްފައިވާ ކްރެޑިޓް ކާޑެއް މުއްދަތު ހަމަވެގެން ނުވަތަ ހަލާކުވެގެން ނުވަތަ ގެއްލިގެން އާ ކުރާނަމަ ރާއްޖޭން ބޭރުގެ މުއާމަލާތް ކުރުމަށް މަހުން މަހަށް ލިބޭ ލިމިޓް މިއަދު އިއުލާންކުރި ބަދަލުތަކާ އެއްގޮތަށް އަމަލުކުރާނެ ކަމަށްވެސް އެ ބޭންކުން ބުނެ އެވެ.