މާލޭގައި ގެއެއްގެ ތެރޭގައި އަންހެނަކަށް ވަޅިން ބިރު ދައްކާ ރަހީނުކުރުމުގެ އަމަލު ހިންގި މީހަކީ ޖަލު އަދަބު ލުއިކޮށްދިނުމުން މީގެ ދެ އަހަރު ކުރިން މިނިވަންވެފައިވާ މީހެއް ކަމަށް އެނގިއްޖެ އެވެ.
އަންހެނަކު ރަހީނުކުރުމުގެ ކުށުގައި ފުލުހުން ރޭ ހައްޔަރުކުރި މީހަކީ ށ. މިލަންދޫ، ހެޕީލޭންޑް، އަހުމަދު އަތުހަރު އެވެ.
އޭނާގެ މައްޗަށް މީގެކުރިން ކުރި ކުށެއް ސާބިތުވެ ޖަލު ހުކުމެއް ތަންފީޒު ކުރަމުން ދަނިކޮށް އޭނާ މިނިވަން ކުރީ 2022 ވަނަ އަހަރު ރައީސް އިބްރާހީމް މުހައްމަދު ސޯލިހް އެވެ.
ރައީސް ސޯލިހްގެ ވެރިކަމުގައި އޭނާ ދޫކޮށްލީ ޝަރުތުތަކެއް ކުރުމަށްފަހު ކަމަށް އެނގިފައިވެ އެވެ.
އަތުހަރު ރަހީނު ކުރި އަންހެން މީހާ އަކީ އޭނާ ލޯބީގެ ގޮތުން ގުޅިގެން އުޅުނު އަންހެން މީހާ ކަމަށް މައުލޫމާތު ލިބެ އެވެ.
ދެ މީހުންގެ ތެރޭގައި މައްސަލަ ހޫނުވީ އަންހެން މީހާ މަސައްކަތް ކޮށްގެން ހޯދާ ފައިސާ އިން އެ ދެ މީހުން އުޅޭ ތަނަށް ކުލި ދައްކަމުން ދިޔައިރު އަތުހަރު ވަޒީފާއަކަށް ނުގޮސް އަންހެން މީހާ އަތުން ފައިސާ ހޯދަމުންދާތީ ފެށުނު ޒުވާބެއްގެ ތެރެއިންނެވެ.
އަތުހަރު ވަނީ އަންހެން މީހާ ރަހީނުކޮށްގެން ގެއިން ނެރުމަށްފަހު ސައިކަލެއްގައި އަންހެން މީހާ ގޮވައިގެން އެހެން ތަނަކަށް ދާން މަސައްކަތް ކޮށްފަ އެވެ. ނަމަވެސް ފުލުހުން އޭރުވެސް ދިޔައީ އެ ދެ މީހުންގެ ކައިރީގައި ހަރަކާތްތެރިވަމުންނެވެ.
އަތުހަރުގެ ކިބައިން އަންހެން މީހާ ސަލާމަތް ކުރީ ފުލުހުން ބާރުގެ ބޭނުންކޮށްގެންނެވެ. މިހާދިސާއަށްފަހު އަތުހަރާއި އަންހެން މީހާއަށްވެސް ކޮންމެވެސް ވަރެއްގެ އަނިޔާތަކެއް ލިބުމާ ގުޅިގެން ހޮސްޕިޓަލްގައި ފަރުވާ ދީފައިވެ އެވެ. ނަމަވެސް ފުލުހުން މިއަދު ބުނީ ދެ މީހުންގެ ހާލުވެސް ރަނގަޅު ކަމަށެވެ.