ރާއްޖެއާއި ބައިނަލްއަގްވާމީ މުބާރާތްތަކުން ރާއްޖެއަށް ފަހުރުވެރި ބޮޑެތި ކާމިޔާބީތަކެއް ހޯދައިދީފައިވާ ދިވެހި ބޮޑީބިލްޑަރު މުހައްމަދު ޔާމީން (ޔާންބެ)ގެ ކިޑްނީ ފެއިލްވުމުން އެހީ ހޯދުމަށް ކުރިއަށް ގެންދިޔަ ޓިކްޓޮކް ލައިވްގައި ދެ ލައްކައަށްވުރެ ގިނަ ރުފިޔާގެ އެހީ ލިބިއްޖެ އެވެ.
ޔާންބެއާއެކު ރޭ ކުރިއަށް ގެންދިޔަ ޓިކްޓޮކް ލައިވްގައި 210،000 ރުފިޔާ އާއި 1،300 ޑޮލަރުގެ އެހީ ލިބުނެވެ.
ޔާމީން އަކީ އެންމެ ފަހުން ބޭއްވި ބޮޑީބިލްޑިން މުބާރާތުގެ މިސްޓަ މޯލްޑިވްސް އެވެ. އޭނާ ވަނީ މި މުބާރާތް ހަތަރު އަހަރު ކާމިޔާބު ކޮށްފަ އެވެ. ޔާމީން ފިޔަވާ އެހެން މީހަކަށް ހަތަރު އަހަރު މިސްޓަ މޯލްޑިވްސް ހޯދިފައެއް ނުވެ އެވެ.
ޔާމީން ވަނީ މިދިޔަ އަހަރު ބޭއްވި އޭޝިއާގެ ބޮޑީބިލްޑިން އަދި ފިޒީކް ސްޕޯޓްސް ޗެމްޕިއަންޝިޕުގެ 85 ކިލޯގެ ކެޓަގަރީން ރަން މެޑަލް ހޯދާފަ އެވެ. އަދި މީގެ ދެ އަހަރު ކުރިން 2022 ވަނަ އަހަރު ބޮޑީ ބިލްޑިން ވޯލްޑް ޗެމްޕިއަންޝިޕްގައި ސުޕަ 90 ކިލޯގެ ކެޓަގަރީގެ ފައިނަލުގައި ވާދަކޮށް ލޯ މެޑަލް ވެސް އޭނާ ހޯދި އެވެ.
ޑޮކްޓަރުން ވަނީ ކިޑްނީ ޓްރާންސްޕްލާންޓް ކުރުމަށް ޔާމީންއަށް ލަފާދީފަ އެވެ.
ޔާމީން ބުނީ މިފަދަ ސިއްހީ ބޮޑު މައްސަލައެއް އުޅޭކަން ކުރިން އެއްގޮތަކަށްވެސް އެނގިފައި ނުވާ ކަމަށެވެ. ކިޑްނީ ފެއިލްވެފައިވާކަން އެނގުނީ މިކަމާ ގުޅޭ ޓެސްޓްތައް ހަދައި ގިނަ ޑޮކްޓަރުންނަށް ދައްކާ ޔަގީންކުރުމުން ކަމަށްވެސް ބުންޏެވެ.
ޔާމީންގެ ފަރުވާއަށް ބޭނުންވާ ފައިސާ ހޯދުމުގެ މަސައްކަތް އޭނާގެ އުފަން ރަށް -- ށ. ފުނަދޫ ބަޔަކު އިސްވެ ދަނީ ކުރަމުންނެވެ.