ރާއްޖޭގައި ކުރިއަށްދާ ސެންޓްރަލް އޭޝިއާ ވޮލީބޯލް އެސޯސިއޭޝަން (ކާވާ) ވިމެންސް ވޮލީބޯލް ޗެލެންޖު ކަޕްގެ ތިންވަނަ އަދި ބްރޯންޒް މެޑަލް ތަޖިކިސްތާނުން ހޯދައިފި އެވެ.
ސޯޝަލް ސެންޓަރުގައި މިއަދު ކުޅުނު މެޗުގައި ތަޖިކިސްތާނުން އަފްގާނިސްތާނާ ކުރިމަތިލައި މޮޅުވީ 3-1ގެ ނަތީޖާ އަކުންނެވެ.
މި މެޗުގައި ދެ ޓީމުންވެސް ވާދަވެރި ކުޅުމެއް ދެއްކި އެވެ. ފުރަތަމަ ދެ ސެޓު ތަޖިކިސްތާނުން ކާމިޔާބުކުރީ 25-18ގެ އެއް ނަތީޖާއަކުންނެވެ.
އަފްގާނިސްތާނުން ތިންވަނަ ސެޓު 25-19 އިން ކާމިޔާބުކުރި ނަމަވެސް ހަތަރުވަނަ ސެޓުގައި ތަޖިކިސްތާނުން އަނެއްކާވެސް 25-18 އިން މޮޅުވެ، މެޗު ނިންމާލި އެވެ.
މި މުބާރާތުގެ ފައިނަލް މެޗުގައި މިރޭ ކުޅެނީ ރާއްޖޭގެ އަންހެން ޓީމާއި ކިރިގިސްތާނުގެ އަންހެން ޓީމެވެ.