މުއްދަތު ހަމަވެފައިވާ ކްލޮރިން އަޅައިގެން ފެނަކަ ދަރަވަންދޫ ބްރާންޗުން ފެން ދޫކުރަމުންދާ ކަމަށް ބުނެ، އެކަން ހުއްޓުވުމަށް ދަރަވަންދޫ ކައުންސިލުން ފެނަކައާ ދެކޮޅަށް ކޯޓަށް ހިނގައްޖެ އެވެ.
މުއްދަތު ހަމަވެފައިވާ ކްލޮރިން އަޅައިގެން ފެނަކަ ދަރަވަންދޫ ބްރާންޗުން ފެން ދޫކުރުމުންދާ ކަމަށް ބުނެ ރަށު ކައުންސިލުން ކޯޓުގައި އެދިފައިވަނީ ކޯޓު އަމުރަކުން އެކަން ހުއްޓުވައި ދިނުމަށެވެ.
ދަރަވަންދޫ ކައުންސިލުން އެ ރަށު މެޖިސްޓްރޭޓް ކޯޓަށް ހުށަހެޅި މައްސަލައިގައި ބުނެފައިވަނީ ރަށު ކައުންސިލާއި ރަށު ސިއްހީ މަރުކަޒުގެ ޕަބްލިކް ހެލްތު ޑިޕާޓްމަންޓުން ބެލި ބެލުމުން މި ވަގުތު ފެނަކައިން ދޫކުރަމުންދަނީ މުއްދަތު ހަމަވެފައިވާ ކްލޮރިން އެޅި ފެން ކަން ސާބިތުވާ ކަމަށެވެ. އަދި އެކަމަށް ފެނަކަ ބްރާންޗް ހިންގެވުމާ ހަވާލުވެ ހުންނެވި އިސް ފަރާތުންވެސް އިއުތިރާފްވާ ކަމަށް މައްސަލައިގައި ކައުންސިލުން ބުނެފައިވެ އެވެ.
މި ދައުވާގެ ރައްދުގައި ފެނަކައިން ނެގީ އިޖުރާއީ ކަންތައްތަކެވެ. އެގޮތުން ދައުވާ ހުށަހެޅުމާއި ގުޅޭ އިޖުރާއީ މައްސަލަތަކާއި ދައުވާ ފޯމާ ގުޅޭ އިޖުރާއީ މައްސަލަތަކާއި އަދި ދައުވާއާ ގުޅިގެން ހުށަހަޅާފައިވާ ހެކިތައް ހޯދާފައިވާ ގޮތާ ގުޅޭ ގޮތުން އިޖުރާއީ ގޮތުން ހުރި ކަންކަން ފެނަކައިން ވަނީ ޝަރީއަތުގައި ފާހަގަކޮށްފަ އެވެ.
ފެނަކައިން މި މައްސަލައިގައި ނެގި އިޖުރާއީ ނުކުތާތަކުގެ އަލީގައި މައްސަލަ ބެއްލެވި މެޖިސްޓްރޭޓް މަރިޔަމް ރަސާ ރާފިއު ނިންމެވީ، ރަށު ކައުންސިލުން އެދުނު އަމުރު ނެރެދެވޭނެ ތަނެއް ނެތް ކަމަށެވެ.
ދަރަވަންދޫ މެޖިސްޓްރޭޓް ކޯޓަށް އޮގަސްޓް 29 ވަނަ ދުވަހު ހުށަހެޅި މި މައްސަލަ އެ ކޯޓުން ނިންމީ މިދިޔަ ބުރާސްފަތި ދުވަހު އެވެ.