މާލޭގައި ހުންނަ ފިހާރައަކަށް ވަދެ ބިދޭސީއެއްގެ ކަރުގައި ވަޅި އެޅި މައްސަލައިގައި ހައްޔަރު ކުރި އަންހެން މީހާ، ތޫނު އެއްޗެއް ބޭނުންކޮށްގެން މާރާމާރީ ހިންގި މައްސަލައެއްގައި އަނެއްކާވެސް ހައްޔަރުކޮށްފި އެވެ.
ތޫނު ހަތިޔާރާއެކު މާރާމާރީ ހިންގިކަމުގެ ތުހުމަތުގައި ހައްޔަރު ކުރި އަންހެން މީހާއަކީ ތ. ތިމަރަފުށި ސަލްވާ، ފާތިމަތު ޝަހުދާ އެވެ.
ޝަހުދާ ހައްޔަރުކުރިއިރު އޭނާގެ އަތުން ކަޓަރެއްވެސް ފެނިފައިވެ އެވެ. އޭނާ ހައްޔަރުކޮށް އޭނާގެ ބަންދަށް ކޯޓުން މިއަދު ވަނީ 15 ދުވަސް ޖަހާފަ އެވެ.
މި އަންހެން މީހާ އަކީ މިފަދަ ކުށްތަކުގެ ރެކޯޑް އޮންނަ މީހެއްކަން އޭނާގެ ބަންދު އަމުރުގައިވެސް ފާހަގަކޮށްފައިވެ އެވެ.
ޝަހުދާ ވަނީ މީގެ ކުރިން މަޖީދީމަގުގައި ހުރި ފޯނު ފިހާރައަކަށް ވަދެ އެތަނުގެ ސޭޓަކަށް ހުރި ބަންގްލަދޭޝްގެ ފިރިހެނެއްގެ ކަރުގައި ވަޅި އެޅުމާ ގުޅިގެން ހައްޔަރުކޮށްފަ އެވެ.
އެ މައްސަލައާ ގުޅިގެން ދެ ފަހަރެއްގެ މަތިން މި އަންހެން މީހާ ބަންދު ކުރި އެވެ. އެ ފަހަރު މި އަންހެން މީހާ ސޭޓަށް ވަޅިން ހަމަލާދޭ މަންޒަރުގެ ވީޑިއޯވެސް ސޯޝަލްމީޑިއާގައި ބަޔަކު އާންމުކުރި އެވެ.