ޑީޕޯޓް ކުރި މީހެއްގެ މައްސަލައިގައި އިމިގްރޭޝަނުން ކޯޓުގައި ޖަވާބުދާރީވާން ޖެހިއްޖެ

ދިވެއްސަކާ ކައިވެނިކޮށްގެން އުޅެނިކޮށް ގެވެށި އަނިޔާގެ މައްސަލައެއް އުޅޭ ކަމަށް ބަލައި ޑީޕޯޓްކޮށްފައިވާ ލަންކާ މީހަކު އަލުން އެނބުރި ރާއްޖެ އައުމަށް ހުރަސްތަކެއް ކުރިމަތިވި މައްސަލައިގައި އިމިގްރޭޝަނުން ޖަވާބުދާރީވާން ސިވިލް ކޯޓުން އަންގައިފި އެވެ.

ޑީޕޯޓްކޮށްފައިވާ ލަންކާ މީހަކަށް ރާއްޖެ އައުމުގައި ހުރަސްތަކެއް ކުރިމަތިވީކަން އެންމެ ފުރަތަމަ އެނގުނީ އިމިގްރޭޝަނުން އެ މީހާ ޑީޕޯޓްކޮށްލި ކޮށްލުން ބާތިލްކުރަން ކޯޓަށް ހުށަހެޅި މައްސަލައިގެ ތެރެއިންނެވެ.

އެ މައްސަލަ ކޯޓުގައި ހިނގަމުންދާއިރު މައްސަލަ ބާތިލުކޮށް ވަގުތީ އަމުރެއް ނެރެން ކޯޓުގައި އެ މީހާ އެދުނު ނަމަވެސް އެ އަމުރު ކޯޓުން އަދި ނެރެދީފައެއް ނުވެ އެވެ.

ހައިކޯޓުގައި އިސްތިއުނާފުވެސް ކޮށްފައިވާ މި މައްސަލައިގައި ސިވިލް ކޯޓުން ވަނީ މައްސަލައަށް ޖަވާބުދާރީވާން އިމިގްރޭޝަނަށް އަންގާފަ އެވެ. އެއީ މައްސަލައާއި ގުޅިގެން ކޯޓުގެ އިހްތިސާސްއާ މެދު ސުވާލު އުފައްދައި އިމިގްރޭޝަނުން ނެގި އިޖުރާއީ ނުކުތާތަކާ ގުޅިގެންނެވެ.

ދިވެއްސަކާ އިނދެގެން އުޅުނު ލަންކާ މީހާއަށް ވަނީ ދަރިއަކުވެސް ލިބިފަ އެވެ. ދަރި ރަޖިސްޓްރީ ކޮށްފައިވަނީ ރާއްޖޭގައި ކަމަށް މައުލޫމާތު ލިބިފައިވެ އެވެ.

މި ދެމަފިރިން މިދިޔަ ފެބްރުއަރީ މަހު ވަރިވީ ފަހުން، ލަންކާ މީހާއަށް އޮތް މެރިއޭޖް ވިސާ ވަނީ ކެންސަލް ވެފަ އެވެ. ކައިވެނި ރޫޅުނު ފަހުން ލަންކާ މީހާގެ މައްޗަށް ރައްކާތެރިކަމުގެ އަވަސް އަމުރެއް ފެމިލީ ކޯޓުން ވަނީ ނެރެފަ އެވެ. އެހެންކަމުން މި ލަންކާ މީހާއާ ގުޅޭ ގެވެށި އަނިޔާގެ ކޮންމެވެސް ކަމެއް ހިނގާފައިވާ ކަމަށް ބެލެވެ އެވެ.

މި މައްސަލައިގައި ލަންކާ މީހާ ކޯޓުގައި އެދުނީ ޓޫރިސްޓް ވިސާގައި އޭނާއަށް ރާއްޖޭ އާދެވޭނެ ކަމާއި، އިތުރު އުނދަގުލަކާ ނުލައި އެންޓްރެންސް ސްޓޭމްޕް ޖަހައިދީ ރާއްޖެއަށް އައުމުގެ ހުއްދަ ދިނުމަށް އިމިގްރޭޝަންގެ މައްޗަށް އަމުރެއް ނެރެދިނުމަށެވެ.

ލަންކާ މީހާ ކޯޓުގައި ބުނެފައިވަނީ އިމިގްރޭޝަނުން އޭނާގެ ވިސާ ބާތިލުކޮށްފައިވަނީ އޭނާ ޑީޕޯޓް ކޮށްލިކަން ނުވަތަ ބްލެކްލިސްޓް ކުރިކަން އޭނާއަށް ނާންގާ ކަމަށެވެ. އެހެންނަމަވެސް އޭނާ އެދުނު އަމުރު އަދި މިވަގުތަށް ނެރެވެން ނެތް ކަމަށް ކޯޓުން ނިންމީ އެވެ.