ސައިކަލަކުން ފުލުހެއްގެ ގައިގައި ޖެއްސި މީހަކު 10 ދުވަހަށް ބަންދުކުރުމަށް ކްރިމިނަލް ކޯޓުން އަމުރުކޮށްފި އެވެ.
މި މައްސަލައިގައި ހައްޔަރުކޮށްފައިވަނީ ޅ. ކުރެންދޫ، މަގުމަތީގެ، އަލީ ސަމާހް މުހައްމަދު (24އ) އެވެ.
ފުލުހުން ބުނީ މި މަހުގެ 17ވަނަ ދުވަހު މާލޭ ހެންވޭރު ދަނޑު ކައިރީގައި ހުރި ޗެކްޕޮއިންޓެއްގައި ފުލުހުން ހަރަކާތްތެރިވަމުން ދަނިކޮށް ސަމާހު ބާރު ސްޕީޑުގައި ސައިކަލު ދުއްވުމުން ފުލުހުން އޭނާގެ ގާތު މަޑުކުރުމަށް ބުނެފައިވާ ކަމަށެވެ. ނަމަވެސް އޭނާ ފުލުހެއްގެ ގައިގައި ސައިކަލުން ޖެއްސުމަށްފަހު މަޑުނުކޮށް ވަނީ ފިލާފައި ކަމަށް ވެސް ފުލުހުން މައުލޫމާތުދެ އެވެ.
ސަމާހު ސައިކަލުން ޖެއްސި ފުލުހަށް ލިބިފައިވާ އަނިޔާއެއް އަދި އެނގިފައެއް ނުވެއެވެ.
އެ މައްސަލައިގައި ސަމާހާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން ކޯޓުން ވަނީ އޭނާ 10 ދުވަހަށް ބަންދުކުރުމަށް އަމުރުކޮށްފައެވެ.
ދާދި ފަހުން ވެސް ބާރު ސްޕީޑުގައި ނުރައްކާތެރިކޮށް ދުއްވާފައި ދިޔަ ސައިކަލަކުން ވަނީ ފުލުހެއްގެ ގައިގައި ޖެހިފައެވެ. އެ މައްސަލައިގައި ހައްޔަރުކުރި ކ. މާލެ، މއ. ހިތްތަލަވިލާ، އާދަމް ޒިދާން (23އ) ވަނީ ފަސް ދުވަހަށް ބަންދުކޮށްފަ އެވެ.