ރާއްޖެއިން ބޭރުން އަހަރު 100 އިމާމުން ތަމްރީނުކުރުމަށް މަސައްކަތްކުރަމުން އަންނަ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
އިމާމުންގެ މަހާސިންތާ ފެށުމުގެ ރަސްމިއްޔާތުގައި ވާހަކަދައްކަވަމުން މިނިސްޓަރު ޝަހީމް ވިދާޅުވީ އާ މަންހަޖުގެ ތެރެއިން މިއަހަރު 400 އިމާމުން ތަމްރީނުކޮށްފައިވާ ކަމަށާއި ރާއްޖެއިން ބޭރުގައި 60 އިމާމުން ތަމްރީނުކޮށްފައިވާ ކަމަށެވެ.
މިނިސްޓަރު ވިދާޅުވީ މި އަހަަރު ނިމުމުގެ ކުރިން ރާއްޖެއިން ބޭރުގައި 100 އިމާމުން ތަމްރީނުކުރުމަށް މަސައްކަތް ކުރަމުން އަންނަ ކަމަށެވެ.
"މި ފަސް އަހަރު ތެރޭގައި މަދުވެގެން 500 އިމާމުން ރާއްޖެއިން ބޭރަށް ފޮނުވައިގެން ތަމްރީނު ކުރާނަން،" ޝަހީމް ވިދާޅުވި އެވެ.
މި ދައުރުގައި މަދުވެގެން 1،000 ޒުވާން ހަތީބުން ވެސް ނެރުމަށް މަސައްކަތް ކުރައްވާނެ ކަމަށްވެސް އޭނާ ވިދާޅުވި އެވެ.
އޭގެ އިތުރުން އިމާމުންގެ އާ އޮނިގަނޑު އެކުލަވާލާނީ ވެސް މަހާސިންތާގައި ކުރެވޭ މަޝްވަރާތަކާއި، ނިންމުންތަކާއެކު ކަމަށް މިނިސްޓަރު ވިދާޅުވި އެވެ.
މަހާސިންތާގެ މަގުސަދުތައް
- ރާއްޖޭގެ އިމާމުންގެ މެދުގައި އެއްބާރުލުމާއި އެކުވެރިކަން އުފެއްދުން
- އިމާމުންނަށް ދިމާވާ ދަތިތައް ދެނެގަތުން
- އިމާމުންނަށް ކުރިމަތިވާ ދަތިތައް ހައްލުކުރާން ގޮތް އުނގަންނައިދިނުން
- ކައުންސިލުތަކާ ގުޅިގެން މިސްކިތްތައް ބަލަހައްޓާނެ ގޮތް އުނގަންނައިދިނުން
- މުޖުތަމައުގެ ކަންކަމުގައި އިމާމުންގެ ދައުރު އުނގަންނައިދިނުން
- މިސްކިތްތަކަކީ މީހުން ދާހިތްވާ ތަނަކަށް ހެދުމަށް ކުރެވިދާނެ ކަންކަން އަންގައިދިނުން
- އިމާމުންގެ ދައުރު ބުނެދިނުން
މި މަހާސިންތާ ކުރިއަށް ގެންދަނީ ޖުމްލަ 508 އިމާމުންނާއެކު އެވެ. އެގޮތުން އޮންލައިންކޮށް 300 އިމާމުން ވެސް ބައިވެރިވެފައިވެ އެވެ.