ވައުދަށް ހުރުމަތްތެރިކޮށް ހިތުމާއި ކެތްތެރިވުމަކީ މި ފަދަ ޒަމާނެއްގައި ކޮންމެހެން ހުރުން މުހިންމު ސިފަތަކެއްކަމުގައި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
ފުވައްމުލައް ސިޓީގައި ރޭ ބޭއްވި ޒިކުރާ އިންޓަނޭޝަނަލް ކޮލެޖްގެ ދަސްވެނިވުމުގެ ހަފުލާ ޝަރަފުވެރިކޮށް ދެއްވާ މިނިސްޓަރު ޝަހީމް ވިދާޅުވީ ކޮންމެ ދަރިވަރަކުވެސް ދަސްވެނިވުމަށްފަހު މުޖްތަމައަށް ހިދުމަތްކުރަން ނިކުންނަންވާނީ ﷲ ގެ ވަޖުހުފުޅު އެދިގެން ކަމަށެވެ.
މީސްތަކުންނަށް އިހުސާންތެރިވުމާއި ހިދުމަތް ދިނުމުގައި މާއްދީ ފައިދާއެއް ހޯދުމުގެ މައްޗަށް ސަވާބާއި ދަރުމަ ހޯދުން އިސްކުރުމަށް ޝަހީމް އެދިވަޑައިގެންނެވި އެވެ.
އިސްލާމްދީނުގައި އިލްމާއި ތަރުބިޔަތަކީ ގުޅި ލާމެހިފައިވާ ދެ އަސާސް ކަމަށް ޝަހީމް ވިދާޅުވި އެވެ. އެހެންކަމުން ދަސްވެނިވެގެން ނިކުންނައިރު އިސްލާމީ އަހުލާގުން އަހުލާގު ލިބިގަނެ ނަމޫނާ ބަޔަކަށްވުމަށް ވަޒީރު އިލްތިމާސް ކުރެއްވި އެވެ.
މައިންބަފައިންނަށް އިޙުސާންތެރިވުމާއި އަވައްޓެރިންނާއި މެހުމާނުންނަށް ހެޔޮކޮށް ހިތުމާއި ހެޔޮ ބަސްބުނުމަކީ ﷲ އަށްޓަކައި ދިރިއުޅޭ މީހުންގެ އަހުލާގު ކަމުގައިވެސް މިނިސްޓަރު ޝަހީމް ވިދާޅުވި އެވެ.