އިމާމުންގެ ކަންކަމުގައި މަޝްވަރާ ހޯދުމަށް އިމާމުންގެ މަޖިލީހެއް އުފައްދަވާނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
އިމާމުންގެ މަހާސިންތާ ނިންމުމަށް ބޭއްވި ރަސްމިއްޔާތުގައި ވާހަކަ ދައްކަވަމުން މިނިސްޓަރު ޝަހީމް ވިދާޅުވީ އިމާމުންގެ ކަންކަމުގައި ސިޔާސަތު ކަނޑައެޅުމަށް އިމާމުންގެ މަޖިލީހެއް އުފައްދަވާނެ ކަމަށެވެ.
އެ މަޖިލީހުގައި ކުރާ މަޝްވަރާގެ ލަފާގެ މަތިން މިނިސްޓްރީގައި އިމާމުންނާބެހޭ ކަންކަން ކުރިއަށް ގެންދާނެ އިންތިޒާމު ވެސް ހަމަޖެއްސެވުމަށް މަސައްކަތް ކުރާނެ ކަމަށް ޝަހީމް ވިދާޅުވި އެވެ.
ޝަހީމް ވިދާޅުވީ ރާއްޖޭގައި ހުރި އިސްލާމީ މަރުކަޒުތަކަށް ދެ އިމާމަކު ހަމަޖައްސާނެ ކަމަށެވެ.
އޭގެ ތެރެއިން މައި އިމާމަކަށް ހުންނާނީ ޑިގްރީއަށް ކިޔަވާފައި ހުންނަ އިމާމެއް ކަމަށާއި ދެން ހުންނަ އިމާމަކީ ބަންގި ދިނުމަށް ހާއްސަ އިމާމެއް ކަމަށް އޭނާ ވިދާޅުވި އެވެ.
ޝަހީމް އިތުރަށް ވިދާޅުވީ އެ މަރުކަޒުތައް ހުންނަ ހިސާބުތަކަށް އިސްލާމިކް މިނިސްޓްރީގެ މަންދޫބުން ވެސް ހަމަޖައްސަވާނެ ކަމަށެވެ.
އިމާމުންގެ ތެރޭގައި ތަފާތު އެކި ބަލިތައް ތަހައްމަލުކުރަމުންދާ އިމާމުން ތިބިކަން ފާހަގަކުރައްވާ ޝަހީމް ވަނީ އިމާމުންނަށް އިންޝުއަރެންސް ދިނުމަށް މަސައްކަތް ކުރަމުންދާ ކަމަށް ވިދާޅުވެފަ އެވެ.
މީގެ އިތުރުން މަހާސިންތާގައި އިމާމުން ފާހަގަކުރި ކަންކަމަށް މަސައްކަތްކުރައްވާނެކަމުގެ ޔަގީންކަން ޝަހީމް ދެއްވި އެވެ.
މި މަހާސިންތާ ކުރިއަށް ގެންދިޔައީ ޖުމްލަ 508 އިމާމުންނާއެކު އެވެ. އެގޮތުން މި މަހާސިންތާގައި އޮންލައިންކޮށް 300 އިމާމުން ބައިވެރިވި އެވެ.