މައްސަލައެއްގައި ތުހުމަތު ކުރެވި ފުލުސް އޮފީހަށް ގެންދިއުމުން، ފުލުހަކ "ކޮށާލާނެ" ކަމަށް ބުނެ އިންޒާރު ދިން މީހަކު ޖަލަށްލާން ހުކުމްކޮށްފި އެވެ.
މިއީ، 2020 ވަނަ އަހަރުގެ އޮކްޓޫބަރު މަހު އައްޑު އަތޮޅު ފޭދޫ / ސްނޯވައިޓް އަހްމަދު ޝިޔާޒް ނަމަކަށް ކިޔާ މީހެއްގެ މައްސަލައެވެ.
މި މައްސަލަ ނިމުނު ގޮތުގެ ރިޕޯޓުން އެނގޭ ގޮތުގައި މައްސަލައެއްގެ ތުހުމަތުގައި ޝިޔާޒް ފުލުސް އޮފީހަށް ހާޒިރުކުރުމުން އޭނާ ވަނީ ފުލުހަކަށް މަރުގެ އިންޒާރު ދީފަ އެވެ.
ފުލުހަކާ ދިމާލަށް މަގުމަތިން ފެނިއްޖެއްޔާ "ކޮށާލާނެ" އަދި "މަރާލާނެ" ކަމަށް ބުނެ އިންޒާރު ދިން މި މައްސަލައިގައި ދައުލަތުން ޝިޔާޒްގެ މައްޗަށް އުފުލާފައިވަނީ މީހެއްގެ ފުރާނައަށް ނުވަތަ ހަށިގަނޑަށް ގެއްލުންދީފާނެ ކަމުގެ ބިރު ދެއްކުމުގެ ކުށުގެ ދައުވާއެވެ.
މި މައްސަލައިގެ ޝަރީއަތުގައި ޝިޔާޒް ވަނީ އޭނާގެ މައްޗަށް ތުހުމަތު ކުރެވުނު ކުށްތަކަށް އިންކާރުކޮށްފައެވެ. އެހެންނަމަވެސް ދައުލަތުން ކޯޓަށް ހުށަހެޅި ހެކިތަކުގެ އަލީގައި ކުށް ސާބިތުވެ، ޝިޔާޒްގެ މައްޗަށް ޖަލު ހުކުމެއް އިއްވީއެވެ. ކުށް ސާބިތުވުމުން ޝިޔާޒް އެދިފައިވަނީ ވީހާވެސް ލުއި އަދަބެއް ދިނުމަށެވެ.
މި މައްސަލައިގައި އައްޑު އަތޮޅު ފޭދޫ މެޖިސްޓްރޭޓް ކޯޓުގެ ގާޒީ އިއްވި ހުކުމަކީ، ޝިޔާޒް ފަސް މަހާއި 23 ދުވަހަށް ޖަލަށްލުމެވެ. މި ހުކުމް އިއްވާފައިވަނީ ހޯމަ ދުވަހު އެވެ.