އައްޑޫ ސިޓީ ލިންކު ރޯޑުގައި ހިނގި ނުރައްކާތެރި އެކްސިޑެންޓެއްގައި ވެމްކޯގެ އައްޑޫ ބްރާންޗުގެ މުވައްޒަފަކު ނިޔާވި އެކްސިޑެންޓްވީ ވޭން ދުއްވަން އިން މީހާގެ މައްޗަށް ކުށް ސާބިތު ނުވެ އޭނާ ސަލާމަތްވެއްޖެ އެވެ.
މިއީ 2019 ވަނަ އަހަރުގެ ކުރީކޮޅު އައްޑޫ ހިތަދޫ ކުނިކޮށި ސަރަހައްދުން ސައިކަލަކާއި ވޭނެއް ޖެހި ހިނގި އެކްސިޑެންޓްގެ މައްސަލަ އެވެ.
މި މައްސަލައިގައި ދައުލަތުން، އެ އެކްސިޑެންޓްވީ ވޭން ދުއްވަން އިން މީހާގެ މައްޗަށް ދެ ދައުވާއެއް އުފުލި ނަމަވެސް ދެ ދައުވާއިންވެސް އޭނާ ވަނީ ސަލާމަތްވެފަ އެވެ.
އެ އެކްސިޑެންޓުގައި ނިޔާވެފައިވަނީ ވެމްކޯގެ އައްޑޫ ބްރާންޗުގެ މުވައްޒަފެކެވެ. އެކްސިޑެންޓް ހިނގާފައިވަނީ ކުނިކޮށި ސަރަހައްދުގައި ހުންނަ ވެމްކޯ އޮފީހަށް، އެތަނުގެ މުވައްޒަފަކު ސައިކަލުން ވަންނަން އުޅެނިކޮށް ވޭނުގައި ޖެހިގެންނެވެ. އެކްސިޑެންޓުވި ވޭނަކީ ފޭދޫ މެޑިސިޓީގެ ވޭނެކެވެ.
އެ މައްސަލައިގައި ވޭން ދުއްވަން އިން މީހާގެ މައްޗަށް އުފުލު އެއް ދައުވާއަކީ، މީހަކު މަރުވެދިޔުމުގެ ފަރުވާ ކުޑަ އަމަލެއް ކުރުމުގެ ކުށުގެ ދައުވާ އެވެ. އެ މީހާގެ މައްޗަށް އުފުލި އަނެއް ދައުވާއަކީ، އަނިޔާއެއް ދިނުމުގެ ދައުވާ އެވެ. އެ އެކްސިޑެންޓްގައި މީހަކު މަރުވުމުގެ އިތުރުން އެހެން މީހަކަށް އަނިޔާވެސްވި އެވެ.
މި ދެ މައްސަލަ ފޭދޫ މެޖިސްޓްރޭޓް ކޯޓުން މިހާރު ނިންމާފައިވާއިރު ދެ މައްސަލަވެސް ނިންމީ ދައުލަތުން ދައުވާ އުފުލި މީހާގެ މައްޗަށް ކުށް ސާބިތުނުވާ ކަމަށެވެ. މި ދެ މައްސަލަ ނިންމީ، ފޭދޫ ކޯޓުގެ އިސް މެޖިސްޓްރޭޓް މުހައްމަދު އަފީފް އެވެ.